काठमाडौं । नेपाली कांग्रेसको संसदीय दलको नेतामा महामन्त्री गगन थापा भिड्ने भएका छन्। संस्थापन इतर पक्षबाट महामन्त्री थापा संसदीय दलको नेताको उम्मेदवार बन्ने सहमति जुटेको हो।

इतर पक्षबाट महामन्त्री थापासँगै नेता शेखर कोइराला पनि संसदीय दलको नेताका दाबेदार थिए। थापा र कोइरालामध्ये १ जनालाई साझा उम्मेदवार बनाउने विषयमा इतर पक्षका नेताहरु सोमबारदेखि छलफलमा थिए।

मंगलबार दिउँसो होटल बसेरामा भएको बैठकमा डा कोइरालाले थापालाई समर्थन जनाएका हुन्। थापाले संसदीय दलको नेताका लागि उम्मेदवारी दिँदा डा कोइराला प्रस्तावक बन्ने पनि सहमति जुटेको बताइएको छ।

महामन्त्री थापाले भने प्रतिनिधि सभाको निर्वाचनताका नै संसदीय दलको नेताका लागि प्रतिस्पर्धा घोषणा गरेका थिए।

संस्थापन पक्षबाट भने सभापति तथा प्रधानमन्त्री शेरबहादुर देउवा संसदीय दलको ‘एकल’ उम्मेदवार छन्। कांग्रेस संसदीय दलको नेताका लागि सभापति देउवा र महामन्त्री थापाबीच प्रतिस्पर्धा हुने भएको हो।

कांग्रेस संसदीय दलको नेता चयनका लागि बुधबार निर्वाचन हुँदैछ। उम्मेदवारहरुको मनोनयन दर्ताको समय भने मंगलबार दिउसोका लागि निर्धारण गरिएको छ।