दाङको एक जंगलमा हत्या गरेर एकै ठाउँमा फालेको अवस्थामा फेला परेका १५ वर्षीया रोशनी महतरा र १४ वर्षीय शरद आचार्यले प्रयोग गर्ने मोबाइल भेटिएको छ । तुलसीपुर उपमहानगरपालिका वडा नम्बर १३ दमारगाउँस्थित सामुदायिक जंगलमा तालिम प्राप्त कुकुरले रोशनी र शरदको मोबाइल फरकफरक ठाउँबाट भेटाएको हो ।

उनीहरूको शव फेला परेकै दिन असोज ३० गते कोहलपुरबाट अनुसन्धानका लागि तालिम प्राप्त कुकुर ल्याइएको थियो । सोही कुकुरको सहयोगबाट मोबाइल फेला पार्न प्रहरी सफल भएको हो ।

साथै प्रहरीले रोशनीको चप्पल पनि भेटाएको छ । मोबाइल भेटिएकाले अब घ,टनाबारे अनुसन्धान गर्न सहज हुने अपेक्षा गरिएको अनुसन्धानमा खटिएका एक प्रहरी अधिकारीले बताए ।

टिपर चालकसहित केही पक्राउ – उनीहरूको शव फेला परेकै दिन दिउँसो प्रहरीले मकावनपुरको हेटौँडा घर भएका एकजना टिपर चालकलाई नियन्त्रणमा लिएको थियो । उनले फोनबाट शरदका हजुरबुवालाई तपाईंको नाति कहाँ छ ? भनेर पटकपटक सोधेको तथ्य खुल्न आएको प्रहरीले बताएको छ ।

ती टिपर चालकको बयानका आधारमा प्रहरीले सल्यानका अर्का एक युवकलाई पनि पक्राउ गरेको छ । ती युवकको गाउँ रोशनी र शरद बस्दै आएको ठाउँ दमारगाउँमा हो । प्रहरीका अनुसार उनीहरू दुवैजना यातायात क्षेत्रमै कार्यरत मिल्ने साथी हुन् ।

शरदका बुवा म्यानपावर व्यवसायी हुन् । शरदकी आमा र उनको छोडपत्र भइसकेकाले शरद आमासँगै दमारगाउँस्थित मामा घरमा बस्दै आएका थिए । उनको मामा गाउँमै एकै विद्यालयमा पढ्ने स्थानीय रोशनीसँगै ह,त्या भएको छ । रोशनीका बुवा आमा र दाइ पनि रोजगारीको सिलसिलामा भारतमा थिए । छोरीको हत्याको खबरपछि हाल उनीहरू घर आएका छन् ।

असोज २७ गते राति साढे १० बजेपछि रोशनी र शरद बेपत्ता भएका थिए । २८ गते स्थानीय कौवापुरस्थित प्रहरी चौकीमा गएर शरदकी माउली हजुरआमाले निवेदन दिएकी थिइन् । खोजी गर्ने क्रममा शरदका माउली हजुर बुवाले नै उनीहरूको शव एकै ठाउँमा फेला पारेका थिए ।

घ,टनास्थल रोशनीको घरदेखि करिब ८० मिटरको दुरीमा पर्छ । कौवापुर प्रहरी चौकीदेखि झन्डै ५०० मिटरको दुरीमा छ । तुल्सीपुर बजारदेखि भने झन्डै १३ किलोमिटर दक्षिणमा रहेको छ । उनीहरूको शवको आज अन्त्येष्टि गरिएको छ । रोशनी र शरदको अन्त्येष्टि दाङको तुलसीपुर उपमहानगरपालिका–१२, शीतलपुरस्थित बबई नदी घाटमा सँगै गरिएको हो ।