वुटवल । नेपाली कांग्रेसका लुम्बिनी प्रदेश सभापति अमर सिंह पुनले स्थानीय तहको सिटको आधारमा आगामी चुनावमा नेकपा (एमाले) ले हार्ने निश्चित भएको ठोकुवा गरेका छन् ।
बिहीबार बुटवलमा आयोजित साक्षात्कारमा पुनले मंसिर ४ गते हुने निर्वाचनमा गठबन्धन दलहरुले सांगठनिक हैसियतका आधारमा सिट बाँडफाँट गर्नुपर्नेमा जोड दिए । उनले दलहरुको हैसियतको आधारमा सिट बाँडफाँट गरे जित हासिल गर्न सकिने दाबी गरे । स्थानीय तहको निर्वाचनमा सिट बाँडफाँट व्यावहारिक नभएकाले कांग्रेसले प्रदेशमा धेरै सिट गुमाएको उनको भनाई छ । रोल्पा र रुकुमलाई संकेत गर्दै उहाँले ती क्षेत्रमा नेकपा (माओवादी केन्द्र) ले ६० प्रतिशत र कांग्रेसले ४० प्रतिशत भागबण्डा गरेर आगामी चुनावमा गठबन्धनमा जान आफूहरु तयार रहेको पनि बताउनुभयो । सभापति पुनले स्थानीय निर्वाचनमा दलहरुले आफ्नो हैसियतभन्दा बढी मागेकाले गठबन्धनको पक्षमा सोचेजस्तो परिणाम आउन नसकेको पनि बताए । ‘हामी त जहाँ पनि लचक थियौं तर अरु पार्टीले हाम्रो लचकतालाई बेवास्ता गरे त्यसैले परिणाममा केही समस्या भयो’ उनले भने ‘आगामी निर्वाचनमा कुन दलको त्यहाँको अवस्था के छ त्यो बुझ्न सकिएन र पुरानै मापदण्ड बनाइयो भनें त्यसले कांग्रेसलाई मात्र नभएर गठबन्धनलाई नै घाटा हुन्छ ।’

उनले कांग्रेसको पक्षमा वातावरण बनेकाले कांग्रेसको विकल्प जनताले नसोचेको पनि बताए । ‘कांग्रेसले हरेक समयमा देश र जनताको लागि काम गरेको छ त्यसैले पनि जनताले रुचाएका छन्’ उनले भने ‘कांग्रेसले शुक्रबारबाट सुरु गरेको अभियानले पार्टीमा देखिएका अन्तरद्धन्द्धलाई व्यवस्थापन गर्दै गठबन्धनका दलसँग सहकार्यको खाका पनि तयार गर्छ ।’