प्रचण्डले दिएको भन्दा बढी भाग ओलीले देउवालाई दिने
काठमाडौं । प्रधानमन्त्री शेरबहादुर देउवा र प्रमुख प्रतिपक्षी दल नेकपा (एमाले) का अध्यक्ष केपी शर्मा ओलीबीच बुधबार प्रधानमन्त्रीको सरकारी निवासमा भेटवार्ता भएको छ ।
लामो समयपछि देउवा र ओलीको औपचारिक भेटवार्ता भएको हो । समाचारस्रोतका अनुसार ओलीले देउवालाई प्रचण्डसँगको गठबन्धन टुटाउन आग्रह गरेका थिए । ओलीले प्रचण्डले गठबन्धनमा धेरै सिट मागेकाले त्योभन्दा बढी अर्थात् ५१ प्रतिशत नै दिने पनि बताएका थिए । ओली नेकपा (माओवादी केन्द्र) लाई गठबन्धनबाट टुटाउन चाहन्छन् । गठबन्धन भएपछि एमालेको पक्षमा मत कम आउँछ भन्ने बुझेका उनले जसरी भए पनि प्रचण्ड र नेकपा (एकीकृत समाजवादी) लाई कमजोर पार्ने योजना बनाएका छन् त्यसका लागि ओलीले जोसँग जस्तो पनि सम्झौता गर्ने भएका छन् । नेकपा (माओवादी केन्द्र) ले गठबन्धनमा धेरै सिट खोजिरहेको छ यसले गर्दा अरु दल पनि धेरै भाग माग्ने अवस्थामा पुगेका छन् । नेकपा (माओवादी केन्द्र) लाई गठबन्धनबाट अलग्याइएपछि एमालेसँग मिल्न आउने ओलीले बुझेका छन् । नेकपा (माओवादी केन्द्र) एक्लै चुनावी प्रतिस्पर्धामा जानुभन्दा पनि अरुसँग मिलेर गए फाइदा हुने निश्कर्षमा पुगेको छ । ओलीले राजनीतिक रुपमा कांग्रेस र सभापति देउवालाई भन्दा पनि प्रचण्ड र नेकपा (एकीकृत समाजवादी) का अध्यक्ष माधवकुमार नेपाललाई प्रमुख दुश्मनका रुपमा हेर्दै आएका छन् । ओलीले आफूलाई हटाएर देउवा प्रधानमन्त्री हुँदा पनि देउवाको खासै विरोध गरेका छैनन् । हिजो प्रधानमन्त्री रहेका बेला ओलीले संविधानविपरीत काम गर्दा पनि देउवाले ओलीको विरोधमा बोलेका थिएनन् त्यसैले पनि सजिलै बुझिन्छ कि ओली र देउवाबीच भित्री कुरामा लेनदेन छ । ओलीले गरेका गलत काममा देउवा नबोल्दा पार्टीले देउवालाई बोल्न बाध्य बनाएको थियो । आगामी निर्वाचनम पनि ओली र देउवाबीच आन्तरिक सेटिङ हुँदा एक अर्काले कमजोर उम्मेदवार बनाएर आफू र आफ्ना मान्छे जित्ने रणनीति नबनाउलान् भन्न सकिँदैन ।
दुई ठूला पार्टीका प्रमुख नेताहरु भएकाले उनीहरु आफ्नो व्यक्तिगत फाइदाका लागि पार्टीलाई घाटा लाग्ने काम पनि गर्न सक्छन् । वालुवाटारमा भएको भेटमा सञ्चारमन्त्री ज्ञानेन्द्रबहादुर कार्की, एमाले उपाध्यक्ष सुवासचन्द्र नेम्वाङ र उपमहासचिव विष्णु पौडेल पनि सहभागी थिए । सञ्चारमन्त्री कार्कीका अनुसार भेटमा ओलीले निष्पक्ष र शान्तिपूर्ण निर्वाचनको विषयमा पनि जिज्ञासा राखेका थिए । झण्डै डेढ घण्टा भएको भेटमा प्रधानमन्त्री देउवाले ओलीले उठाएका विषयमा सकारात्मक जवाफ दिएका थिए । भेटमा देउवाले पार्टीका खास मान्छेलाई पनि बाहिर राखेर ओलीसँग कुरा गरेका थिए । सञ्चारमन्त्री कार्कीलाई बस्ने अवसर दिएका देउवाले पार्टी प्रवक्ता प्रकाशशरण महतलाई पनि बाहिरै राखेका थिए ।