काठमाडौं । पटक पटक पेशी सर्दा राप्रपा नेपालले चुनाव चिन्हका रुपमा माग्दै आएको ‘गाई’ चिन्ह पाउन सकेको छैन । सर्वोच्च अदालतमा यससम्बन्धी वहस हुन नपाउँदा राप्रपा (नेपाल) र अध्यक्ष कमल थापाको इच्छा पूरा हुन पाएन ।
थापाले आफूलाई जसरी भए पनि चुनाव चिन्हका रुपमा ‘गाई’ नै चाहिने भन्दै आएका छन् । थापाको भावनामाथि राप्रपा नेपालका राष्ट्रिय अध्यक्ष प्रदीपविक्रम राणाले खेल खेलेका छन् । थापा दुःखी भए पनि राणा भनें मख्ख परेका छन् । अब भदौ ८ गतेका लागि पेशी तोकिएको छ । राणा र थापाबीच पार्टीको आधिकारिकताको विवाद पनि अदालतसम्म पुगेको छ । राणाले अझै पनि पार्टी आफूले बनाएको र पार्टीमा थापाको कुनै अधिकार नभएको भन्दै आएका छन् ।
केही समयअघि नै आफूहरुले ‘गाई’ चिन्ह पाएको भन्दै राप्रपा नेपालले खुशियाली मनाएको थियो । सर्वोच्च अदालतले साउन २४ गते मंगलबारको लागि तोकिएको पेसी २९ गतेसम्मका लागि सारेको थियो तर २९ गतेको पेशी स्थगित भयो । यो दिन १७ नम्बरमा पेशी राखिएको थियो । राप्रपा नेपालका राष्ट्रिय अध्यक्ष प्रदीपबिक्रम राणाले राप्रपा नेपाललाई गाई चिन्ह दिन नहुने भनेर सर्वोच्चमा गत साउन ८ गते निवेदन दिएका थिए । राणाले ‘गाई’ चिन्ह कुनै पनि अवस्थामा थापाले नपाउने दाबी गरेका छन् । अदालतमा समेत आफूलाई कमजोर पार्ने गरी काम भएकोमा राणाले आपत्ति जनाएका छन् । राणाले थापासरह आफ्नो राजनीतिक हैसियत भएकाले कतै पनि बिभेद नगर्नसमेत सम्बन्धित निकायलाई आग्रह गरेका छन् । थापाले गाई चिन्ह र राजसंस्थाको नामलाई बेचेर खाएको राणाले आरोप लगाएका छन् । उनले कमल थापाले हिजोदेखि नै पार्टीलाई समाप्त गर्ने योजना बनाएकाले थापाबाट पार्टी नचल्नेसमेत ठोकुवा गरेका छन् ।
राणाले निवेदन दिएपछि विवादित बन्दै आएको ‘गाई’ चिन्ह राप्रपा नेपाललाई दिन नमिल्ने भन्दै राप्रपाले पनि आपत्ति जनाएको छ । राप्रपाले आफ्नो झण्डामा गाई भएकाले अर्को पार्टीलाई निर्वाचन चिन्ह दिनु अव्यवहारिक भएको जनाएको छ । कुनै समय राप्रपा नेपालको निर्वाचन चिन्ह गाई थियो । गाई चिन्ह भएकाले नै राप्रपाले समानुपातिकतर्फ धेरै मत ल्याएको थियो । निर्वाचन आयोगले राप्रपा नेपाललाई गाई चिन्ह दिन नमिल्ने जनाइसकेको छ । आफ्नो पार्टीमा आएर साधारण सदस्य हुँदै अध्यक्ष भएर थापाले पार्टी कब्जा गरेकामा राणाले आपत्ति जनाएका छन् । त्यतिमात्र होइन राणाले हिम्मत भए अर्को पार्टी गठन गरेर राजनीति गर्न पनि थापालाई चुनौती दिएका छन् ।
गत फाल्गुण १ गते थापा अध्यक्ष बनेका थिए । राणाले राप्रपा नेपालले मुद्धा फिर्ता लिएर सहयोग गर्न आफूलाई पार्टीले विभिन्न प्रलोभन दिएको भए पनि त्यसलाई बेवास्ता गरेको बताएका छन् । राणा २०७३ सालमा भएको राप्रपाको एकता महाधिवेशनमा थापासँग अध्यक्षमा प्रतिस्पर्धा गरेका थिए । राणाले आफ्नो पक्षमा धेरै मत आए पनि गणना गर्दा सबै नदेखाइएको आरोपसमेत लगाएका छन् ।