काठमाडौं । नेपाल–चीनबीचको दोस्रो ठूलो व्यापारिक नाका तातोपानी चीनले अर्को सूचना नभएसम्मका लागि पूर्ण रूपमा बन्द गरेको छ।

नेपालतर्फ लिपिङ क्षेत्रमा पहिरोको जोखिम बढेको भन्दै चिनियाँ पक्षले व्यापारिक गतिविधि रोकेको ल्हासास्थित नेपाली महावाणिज्यदूत लक्ष्मी निरौलाले जानकारी दिए। पहिरोको जोखिम स्थिर नभएसम्म व्यापार पुनः सञ्चालन हुने सम्भावना कम रहेको उनले बताए।

तातोपानी भन्सार कार्यालयका अनुसार चिनियाँ भन्सार अधिकारीले इमेलमार्फत अर्को सूचना नभएसम्म तातोपानी नाकाबाट हुने आयात–निर्यात बन्द रहने जानकारी गराएका छन्। यात्रु आवतजावत भने जारी रहनेछ।

रसुवाको टिमुरेमा भोटेकोशी बाढीले ठूलो क्षति पुर्‍याएपछि रसुवागढी नाका पनि प्रभावित छ। दसैँ नजिकिँदै गर्दा चीनबाट सामान आयात गर्ने व्यवसायीलाई अब वैकल्पिक रूपमा कोरला नाका प्रयोग गर्नुपर्ने अवस्था आएको छ।