काठमाडौँ । पूर्वअर्थमन्त्री एवम् नेकपा एमालेका उपाध्यक्ष विष्णु पौडेल पक्राउ प्रकरणसँग सम्बन्धित बन्दीप्रत्यक्षीकरण रिटमाथि आज सर्वोच्च अदालतमा सुनुवाइ हुँदैछ।

उक्त रिट न्यायाधीशद्वय टेकप्रसाद ढुंगाना र मेघराज पोखरेलको संयुक्त इजलासमा पेशी चढेको छ ।पौडेललाई सम्पत्ति शुद्धीकरण विभाग यही असार ८ गते सुर्खेतबाट पक्राउ गरेको थियो । पार्टीको कार्यक्रममा सहभागी हुन सर्खेत पुगेका उनलाई त्यहीबाट पक्राउ गरिएको हो ।

उनकी पत्नी दोमाया पौडेलले विष्णुलाई गैरकानुनी रूपमा थुनामा राखिएको उल्लेख गर्दै गत असार १० गते सर्वोच्चमा बन्दीप्रत्यक्षीकरण निवेदन दिएकी थिइन् । उक्त रिटका सम्बन्धमा न्यायाधीश श्रीकान्त पौडेलको इजलासले असार १५ गते महान्यायाधिवक्ताको कार्यालयसँग लिखित जवाफ माग गर्ने र असार १६ गते सुनुवाइ गर्ने आदेश दिएको हो। सोहीअनुसार आज सुनुवाइ हुँदैछ ।