काठमाडौँ । नेकपा एमालेका अध्यक्ष केपी शर्मा ओलीले प्रमुख राजनीतिक दलका नेताहरूबीच हुने सार्वजनिक बहस (पब्लिक डिबेट) को अवधारणालाई सकारात्मक भन्दै आफू त्यसमा सहभागी हुन तयार रहेको घोषणा गरेका छन्।

सामाजिक सञ्जालमार्फत आफ्नो धारणा सार्वजनिक गर्दै उनले देश बनाउने र देश बिगार्ने पक्षबीचको भिन्नता छुट्ट्याउन यस्तो बहस प्रभावकारी हुने विश्वास व्यक्त गरेका छन्।

अध्यक्ष ओलीले वर्तमान चुनावी परिवेशमा नयाँ र पुराना सबै दलहरू मैदानमा उत्रिएको उल्लेख गर्दै मतदातालाई भ्रममा पार्ने प्रचार शैलीको आलोचना गरेका छन्।

“फ्रेमिङ गरेर सामाजिक सञ्जालमा ल्याइएका सामग्रीमार्फत वास्तविक चरित्र लुकाउने प्रवृत्ति देखिएको छ,” उनले भने, “त्यसैले सार्वजनिक बौद्धिक वृत्तबाट भइरहेको पारदर्शी बहसको माग निकै सान्दर्भिक छ।”

आगामी निर्वाचनमा प्रधानमन्त्रीको उम्मेदवार समेत तोकेर मैदानमा आएका दलहरूलाई लक्षित गर्दै ओलीले सबैलाई एउटै मञ्चमा उभिन आग्रह गरेका छन्।

उनले भनेका छन्, “देशको नेतृत्व गर्न खोज्ने दलहरूको एजेण्डा के छ, विगतमा के गरे र भविष्यको मार्गचित्र कस्तो छ भन्नेबारे आमने सामने बहस हुन जरुरी छ।”

अध्यक्ष ओलीले आफू तथ्यका आधारमा आफ्ना काम र भावी योजना प्रस्तुत गर्न प्रतिबद्ध रहेको बताउँदै यस्तो डिबेट आयोजना गर्न सरोकारवालाहरूलाई आह्वान समेत गरेका छन्।

उनले चुनावपछि प्रधानमन्त्री बन्ने आकांक्षा राखेका सबै नेताहरूलाई एउटै मञ्चमा उभिएर जनताका प्रश्नको सामना गर्न चुनौती दिएका छन्।