राजापुर । ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकास मन्त्री कुलमान घिसिङले हिजो बुधबार बर्दियाको राजापुर नगरपालिका–१, दौलतपुर र कैलालीको टीकापुर पार्क जोड्ने कर्णाली नदीमा निर्माण हुने ’मल्टिस्पान’ झोलुङ्गे पुलको शिलान्यास गर्नुभएको छ ।

शहरी विकास मन्त्रालय अन्तर्गतको सस्पेन्स बृज डिभिजनमार्फत भ्याटसहित १५ करोड ७४ लाख रुपैयाँ लागतमा निर्माण हुने यस पुलको लम्बाइ ४८२.२० मिटर र चौडाइ १.६० मिटर रहनेछ। सम्झौता बमोजिम २०८४ असार ११ गतेभित्र निर्माण सम्पन्न हुने यस पुलको मध्य भागमा पर्यटकीय आकर्षणका लागि तस्बिर खिच्न मिल्ने विशेष संरचना समेत बनाइनेछ ।

शिलान्यास समारोहलाई सम्बोधन गर्दै मन्त्री घिसिङले टापुको रूपमा रहेका राजापुर र टीकापुरलाई पर्यटकीय क्षेत्रको रूपमा विकास गर्न र जोखिमपूर्ण जलयात्रा हटाउन यो पुलले महत्त्वपूर्ण योगदान दिने बताउनुभयो। उहाँले पुल निर्माणपछि दौलतपुरतर्फका स्थानीयलाई टीकापुरका क्याम्पस र अस्पतालसम्मको पहुँच सहज हुने तथा कृषि उत्पादन ढुवानीमा सहजता आउने उल्लेख गर्दै तोकिएकै समयमा काम सक्न निर्माण पक्षलाई निर्देशन दिनुभयो ।

पुल शिलान्यास अघि मन्त्री घिसिङले ऐतिहासिक क्षेत्र राजापुरमा सिँचाइ सुविधाको उचित व्यवस्थापनका सम्बन्धमा कुलापानी चौधरी तथा सरोकारवालाहरूसँग छलफल गर्नुभएको थियो। सो क्रममा उहाँले भौरा क्षेत्रको समग्र विकास, सिँचाइको आधुनिकीकरण र नदी कटान नियन्त्रणका लागि केन्द्र सरकार गम्भीर रहेको प्रतिबद्धता व्यक्त गर्नुभयो ।

शहरी विकास मन्त्रालयका सचिव गोपाल सिग्देलले पुल निर्माणले यस क्षेत्रको आर्थिक, सामाजिक र शैक्षिक विकासको आधार तय गर्ने बताउनुभयो भने राजापुर नगरपालिकाका प्रमुख दिपेश थारु र टीकापुर नगरपालिकाका प्रमुख रामलाल दगौरा थारुले यो पुलले लुम्बिनी र सुदूरपश्चिम प्रदेशलाई जोड्दै दुई जिल्लाबीचको सम्बन्ध र पर्यटनमा नयाँ आयाम थप्ने विश्वास व्यक्त गर्नुभयो। यसबाट हाल डुङ्गाको भरमा जोखिमपूर्ण यात्रा गरिरहेका करिब २ हजार घरधुरी प्रत्यक्ष लाभान्वित हुनेछन् ।
आफ्नो भ्रमणको सिलसिलामा मन्त्री घिसिङले बर्दियाका अन्य महत्वपूर्ण पूर्वाधारहरूको समेत स्थलगत निरीक्षण गर्नुभएको छ । उहाँले लामो समयदेखि समस्याको रूपमा रहेको जब्दीघाटको भत्किएको पुल, सत्तिघाट पुल, दलाई घाट तटबन्ध, कर्णाली नदीले कटान गरिरहेको टिहुनी क्षेत्र, ओखरिया इन्टेक र राजापुर सिँचाइ आयोजनाको अवस्थाबारे जानकारी लिनुभएको थियो। यस्तै, ठाकुरद्वारामा उद्योग वाणिज्य सङ्घले आयोजना गरेको अन्तरक्रियामा सहभागी भई उहाँले वन्यजन्तु र मानव बीचको द्वन्द्व समाधानका उपायबारे छलफल गर्नुभयो ।