काठमाडौं । नेकपा एमालेका अध्यक्ष केपी शर्मा ओलीले भदौ २३–२४ को घटनामा भएको महाविनाशको छानबिन हुनुपर्ने बताएका छन् ।

शनिबार एमाले ११ औं महाधिवेशनको उद्‌घाटन गर्दै ओलीले जेनजी आन्दोलनमा भएको क्षतिको निष्पक्ष छानबिन गर्नुपर्ने बताएका हुन् । ‘हामी नबिर्सौं त्यो घटनालाई । त्यस दिनको महाविनाशको छानबिन होस्, दोषी पहिचान होस् र अपराधीले सजाय पाउँन्,’ ओलीले भने, ‘त्यो असामान्य परिस्थितिमा थप क्षति नहोस् भनेर मैले राजीनामा दिएँ, देश अन्योलमा थियो, अन्योल चिर्न संवैधानिक बाटोबाट निकास दिन विकल्प राख्यौं । तर त्यसो भएन ।’

ओलीले संसद् बाहिरको व्यक्तिलाई प्रधानमन्त्री बनाउन दलहरूबीच सहमति हुनुपर्छ भन्ने आफ्नो अडान रहेको बताए । ‘संसद् विघटन हुनुहुन्न भन्ने अडान कायम थियो । अनधिकृत व्यक्तिबाट प्रतिनिधिसभा विघटनको सिफारिस गराइयो । अनधिकृत सिफारिसमा गरिएको विघटन असंवैधानिक छ । तुरुन्त पुनःस्थापना होस्,’ ओलीले भने ।