काठमाडौँ । नेकपा एमालेकी केन्द्रीय सदस्य उषाकिरण तिमल्सिनाले समाज, नागरिकहरू र आफ्नै कमरेडबाट एमाले बेखबर हुनु बिडम्बनापूर्ण भएको बताएकी छन् ।

सोही बेखबर भएकै कारण जेनजी आन्दोलनको अवस्था सिर्जना भएको उनको बुझाइ छ । एमाले महासचिव शंकर पोखरेलले प्रतिनिधिसभा विघटनको निर्णय विडम्बनापूर्ण भएको टिप्पणी गरेसँगै उनलाई जवाफ फर्काउँदै उनले वर्तमान संसद् कोही शासकले र सैनिकले विघटन गरेको नभई आन्दोलनको बलमा भएको बताएकी छन् ।

सामाजिक सञ्जाल फेसबुकमा उनले भनेकी छन्, ‘समाजबाट, नागरिकहरूबाट र आफ्नै कमरेडबाट एमाले बेखबर हुनु बिडम्बनापूर्ण हो । यो संसद् कोही शासकले, कोही सैनिकले विघटन गरेको होइन । हाम्रो गणतन्त्रको मानक सम्माननीय राष्ट्रपतिको रोहबरमा भएको हो’, उनले सामाजिक सञ्जाल फेसबुकमा शुक्रबार जवाफ फर्काएकी छन् ।

उनले अगाडि भनेकी छन्, ‘निश्चय पनि अस्ति २३ र २४ गतेको अकल्पनीय दुर्घटना, हत्या र ध्वंस बिडम्बनापूर्ण थिए । स–साना नानीबाबुहरूको रगत खेर जानु हुन्न । निश्चित समयावधिमा चुनाव होस्, १ सेकेण्ड पनि समय खेर नजाओस् ।’