काठमाडौं । बागमती प्रदेशका खानेपानी खानेपानी ऊर्जा तथा सिँचाइमन्त्री श्यामबहादुर खड्काले राजीनमा दिएका छन् । उनले आज मुख्यमन्त्री बहादुरसिंह लामा तामाङसमक्ष राजीनामा बुझाएका हुन् । खानेपानीमन्त्री खड्काले पनि राजीनामा गरेपछि मुख्यमन्त्री तामाङ झनै संकटमा परेका छन् ।

बागमती कांग्रेस संसदीय दलका नेता तामाङविरुद्ध दलको कार्यालयमा अविश्वासको प्रस्ताव दर्ता भएको छ । केही दिनअघि ईन्द्र बानियाँ समर्थक २१ सांसदहरुले दलको कार्यालयमा अविश्वासको प्रस्ताव दर्ता गराएका थिए । खड्काले पनि राजीनामा दिएसँगै बानियाँको पक्षमा खुल्ने सांसदको संख्या २२ पुगेको छ ।

पार्टी संसदीय दलमा अल्पमतमा परेका मुख्यमन्त्री तामाङलाई राजीनामाको दवाब बढिरहेको छ । तामाङ दलभित्र अविश्वासको प्रस्ताव फेस गर्ने तयारीमा छन् । उनले बानियाँ पक्षधर केही सांसदहरुलाई फकाइरहेको समेत बताइएको छ ।

यसअघि बागमतीका सहकारी मन्त्री मदुकुमार श्रेष्ठ, पर्यटन मन्त्री विमल ठकुरी, युवा तथा खेलकुद मन्त्री मीनकृष्ण महर्जन र आन्तरिक मामिला तथा कानुन मन्त्री सुरजचन्द्र लामिछानेले राजीनामा दिइसकेका छन् । राजीनामा दिएका पाँचै जना निवर्तमान मन्त्रीहरु बानियाँको पक्षमा खुलेका छन् ।
कूल ११० सदस्यीय बागमती प्रदेशसभामा नेपाली कांग्रेसका ३७ सांसद रहेका छन् । संसदीय दलका बहुमतको लागि १९ सांसदको समर्थन आवश्यक पर्छ । अहिले १५ जना सांसदहरुले मात्रै आफूलाई मुख्यमन्त्री तामाङको पक्षमा उभ्याएका छन् । यो संख्या अझै घट्नसक्ने आँकलन गरिएको छ ।