काठमाडौं । रञ्जिता श्रेष्ठ नेतृत्वको नागरिक उन्मुक्ति पार्टीले सरकारलाई दिएको समर्थन फिर्ता लिएको जानकारी संघीय संसद् सचिवालयलाई गराएको छ । अध्यक्ष श्रेष्ठले आज सभामुख देवराज घिमिरेलाई भेटेर नै सरकारलाई दिएको समर्थन फिर्ता लिएको जानकारी गराएकी हुन् ।

नाउपा सुदूरपश्चिम प्रदेश सरकारमा पनि प्रतिपक्षी कित्तामा बसेको छ । सुदूरपश्चिमका आफ्ना मन्त्रीलाई मुख्यमन्त्री कमलबहादुर शाहले बर्खास्त गरेपछि नाउपाले सरकारलाई दिएको समर्थन फिर्ता लिएको हो । यसोसँगै केन्द्र सरकारबाट पनि बाहिरिने उसको निर्णय थियो ।

अहिले अरुण चौधरी पर्यटन राज्यमन्त्रीको जिम्मेवारीमा छन् । उनले आजै प्रधानमन्त्री केपी शर्मा ओलीसमक्ष राजीनामा बुझाउनेछन् । नाउपाले सरकारलाई दिएको समर्थन फिर्ता लिएसँगै प्रधानमन्त्री ओलीले अब ३० दिनभित्र विश्वासको मत लिनुपर्ने संवैधानिक प्रावधान छ ।