इलाम। नेकपा एमालेका अध्यक्ष केपी शर्मा ओलीले नेकपा एमाले छाडेका इलामकै नेताहरू यो पटक निर्वाचनमा एमालेका उम्मेदवार हराउन बेस्सरी लागेको टिप्पणी गर्नुभएको छ।

मंगलबार सुहाङ नेम्बाङ निर्वाचित भएपछि इलाम बजारमा आयोजित सभालाई सम्बोधन गर्दै ओलीले यस्तो बताउनु भएको हो।

साझा नाम भएकाले कोशी प्रदेशको नामाकरण गर्दा केही पनि नबिग्रने ओलीको तर्क थियो। उहाँले कोशी प्रदेशको नामाकरणलाई लिएर कसैले पनि संवेदनशील बन्नुपर्ने आवश्यकता नभएको बताउनु भयो ।

विगतमा पनि मेची, कोशी, कर्णाली, सेती, वागमती अञ्चलको नाम राखिएको उल्लेख गर्दै ओलीले त्यस्ता साझा नाममा असहमति राख्नुपर्ने कुनै कारण नरहेको जिकिर समेत गर्नुभयो । उहाँले उनले समृद्ध नेपालः सुखी नेपाली आम नेपालीको पहिचान भएको र त्यसलाई साकार पार्न एमाले लागि परेको बताउनु भयो ।

अध्यक्ष ओलीले पहिचान भनेको सबै नेपाली एकै हो भन्ने हुनुपर्ने बताउनु भयो। ‘के हो के हो पनि भयो होला। पहिचान भनेको के हो के हो ? केलाई पहिचान भन्ने ? हामी सबै नेपाली हो, पहिलो पहिचान नै त्यही हो।’

सुहाङको जितले वितगको मूल्यांकन र भोलिको राष्ट्रिय राजनीतिको संकेत गरेको बताउनु भयो । उहाँले भन्नुभयो, ‘यो सानो कुरा होइन, यसले विगतका कामको मूल्यांकन गरेको छ। भोलिको राष्ट्रिय राजनीतितर्फ संकेत गरेको छ। श्रीअन्तुतिरबाट इलाममा फेरि उदाएको सूर्यको संकेत गरेको छ।’