काठमाडौं । पूर्व प्रधानमन्त्री तथा नेपाली कांग्रेसका सभापति शेरबहादुर देउवाले नेपालको इतिहासमा एउटा काम गरेर रेकर्ड नै राखेका छन् । पार्टी सञ्चालन गर्नेसहित अन्य केही कुरामा उनीसँग कसैको केही असन्तुष्टि भए पनि २०४८ सालदेखि निरन्तर संसद जितेर उनले रेकर्ड राखेका छन् ।

उनी २०४८, २०५१, २०५६ सालको प्रतिनिधिसभाको निर्वाचनमा विजयी भए । उनी २०६४ र २०७० सालको संविधानसभाका साथै २०७४ सालको र २०७९ सालको प्रतिनिधिसभाको निर्वाचनमा पनि विजयी भए । उनले कहिले दुई क्षेत्रबाट त कहिले एक क्षेत्रबाट निर्वाचन जिते । उनले आफ्नो गृहजिल्ला डडेलधुरा भनें छोडेका छैनन् । उनले कुनैकुनै निर्वाचनमा अन्य क्षेत्रमा पनि गएर निर्वाचन जिते । अहिले भनें एकैजना दुइवटा क्षेत्रमा उम्मेदवार हुन पाइँदैन । देउवाबाहेक अरु कसैले पनि निरन्तर ७ पटक निर्वाचन जितेका छैनन् । देउवा पाँच पटक प्रधानमन्त्री भएका छन् । उनले २०७४ सालको प्रतिनिधिसभाको निर्वाचनमा उम्मेदवार भएर मत माग्न जाँदा ज्योतिषीले आफूलाई सात पटकसम्म प्रधानमन्त्री हुने योग छ भनेर भनेको बताएका थिए । उनी नेपाली कांग्रेस संसदीय दलका नेतासमेत हुन् । ठूलो दलको हैसियतमा प्रधानमन्त्री बन्ने अवस्था आए देउवा फेरि पनि प्रधानमन्त्री बन्न सक्छन् ।