विराटनगर । प्रधानमन्त्री पुष्पकमल दाहाल प्रचण्डले सरकारले एक वर्षमा सोचे अनुसारको नतिजा दिन नसकेको स्वीकार गरेका छन् ।

विराटनगर विमानस्थलमा बिहीवार साँझ सञ्चारकर्मीसँग कुरा गर्दै उनले यस्तो बताएका हुन । गठबन्धनको सरकार भएकाले पनि सोचेअनुसारको काम गर्न नसकेको स्वीकार गरेका हुन् ।

सोचेअनुसार नतिजा दिन नसके पनि सरकार असफल भने नभएको प्रधानमन्त्री प्रचण्डले दाबी गरे । ‘मैले जति सोचेको हो त्यसरी भयो भन्ने मेरो दाबी छैन,’ उनले भने ‘गठबन्धनको सरकार हो । धेरै सीमा र अप्ठ्यारा हुन्छन् । सबैलाई मिलाएर लाने जिम्मेवारी पनि थियो ।’

सुशासन, सामाजिक न्याय, विकास निर्माणको कुरामा भने सरकार सफल भएको उनको भनाइ थियो । ‘सरकारले सामाजिक न्याय, मिटरब्याज पीडितका र नागरिकता समस्या हल गर्यो भ्रष्टाचार र सुशासनको पक्षमा यो स्तरको कहिल्यै छलफल भएको थियो ?, प्रतिप्रश्न गर्दै उनले थपे, ‘भू–माफियाका विरुद्ध कदम चालिएको छ । सरकार अन्तर्राष्ट्रिय क्षेत्रमा पनि ऐतिहासिक रुपमा सफल छ ।’