काठमाडौं । ‘अर्थ नबर्थ गोविन्द गाई, टाउको दुखेको औषधि नाइटोमा लाई’ भनेजस्तै अहिले मन्त्रालयका अधिकांश सचिवहरु मन्त्रालयविज्ञ छैनन् । उदाहरणका लागि गत श्रावण ४ गते पर्यटन, संस्कृति तथा नागरिक उड्डयन मन्त्रालयबाट शिक्षा मन्त्रालयमा सरुवा भएका सचिव सुरेश अधिकारी शिक्षाविज्ञ हैनन् । उनलाई मन्त्रीको ‘एसम्यान’ बनाएर शिक्षा पठाइएको छ ।
यसरी विज्ञताविहीन सचिवलाई गहन जिम्मेवारी बोकेको मन्त्रालयमा पठाउँदा सरकारले नतिजा प्राप्त गर्न सक्दैन र विवादमा पर्दछ । यसै परिप्रेक्ष्यमा कित्ताकाट रोकिएपछि राजश्वमा समेत असर परेको भन्दै कित्ताकाट खुलाउन सरकारले गत श्रावण ४ गते निर्वाचन आयोगका सचिव गोकर्णमणि दुवाडीलाई भूमि व्यवस्था, गरिबी निवारण तथा सहकारी मन्त्रालयमा सरुवा गरेको छ । यसभन्दा अगाडिका सचिवलाई कित्ताकाट खुलाउन र सहकारीको समस्या सुल्झाउन नसकेको आरोपमा खरिद अनुगमनमा सरुवा गरिएको श्रोतले बताएको छ । यसअघिका सचिव डा. दामोदर रेग्मी आगामी कार्तिक ११ गते अवकाश हुँदैछन् ।

रेग्मी मुख्यसचिव हुने चर्चा चले पनि हुन सकेनन् । हालै भूमिसुधार सचिवमा भित्रिएका दुवाडी कुशल प्रशासकको समन्वयकर्ता र जग्गाको बारेमा जानकार मानिन्छन् । सचिव दुवाडी २०७५ सालमा भूमि व्यवस्था तथा अभिलेख विभागको महानिर्देशक बनेर अनुभव हासिल गरेका व्यक्ति हुन् ।

२०७४ श्रावण २६ गतेदेखि कित्ताकाट बन्द भएको भनिए पनि भित्रभित्रै मालपोत र नापी कार्यालयका कर्मचारीले १–२ लाख घुस लिएर कित्ताकाट हुँदै आए पनि मालपोत र नापीका डिजी आँखामा पट्टि बाँधेर बसेको समाचार श्रोतले बताएको छ ।