काठमाडौं । बुधबार राजस्व अनुसन्धान विभागले त्रिभुवन अन्तर्राष्ट्रिय विमानस्थल भन्सार कार्यालयको जाँचपास क्षेत्र पार गरिसकेको झण्डै एक क्वीन्टल सुन बरामद गरेको छ ।

त्रिभुवन अन्तर्राष्ट्रिय विमानस्थल भन्सार कार्यालयको जाँच पास गरेपछि बरामद भएको झण्डै एक क्विन्टल सुन हङकङबाट ल्याइएको पाइएको छ ।

राजस्व अनुसन्धान विभागले मोटरसाइकल र स्कुटरको ‘ब्रेक शु’भित्र लुकाएर ल्याएको सुन बरामद भएपछि सुन तस्करीको नयाँ प्रयोग बाहिरिएको छ ।

करिब एक अर्ब रुपैयाँ मूल्य बराबरको सुन रेडी ट्रेड प्राइभेट लिमिटेडले स्कुटरको ब्रेक शुभित्र राखेर ल्याएको अवस्थामा बरामद भएको । यस प्रकरणमा विभागको विशेष टिमले रेडी ट्रेडका सञ्चालक दिलिप भुजेल र अन्य दुई जनालाई नियन्त्रणमा लिइसकेको छ ।

प्रारम्भिक अनुसन्धानमा यसअघि पनि पटक(पटक रेडी ट्रेडले ब्रेक शु आयात गरेको खुलेको छ । त्रिभुवन विमानस्थल भन्सार र दुई महिनामा करिब २२ पटक यस्तै ‘ब्रेक शु’ आयातपछि सुरक्षा जाँच गरेर लगेको देखिएको स्रोतले बतायो ।

‘यसअघि ब्रेक शु भनेर आयात हुँदा पनि आजजस्तै तरीका अपनाएको हुन सक्छ र हरेक पटकमा १०० किलोका दरले ब्रेक शु आएको हुन सक्छ,’ स्रोतले भन्यो ‘आज जुन अवस्थामा सुन भेटियो यसले २ हजार किलोभन्दा धेरै सुन पछिल्लो २ महिनामा भित्रिएको आशंका जन्माएको छ ।’

राजश्व अनुसन्धान विभागका महानिर्देशक नवराज ढुंगानाका अनुसार यो नेपालमा हालसम्म बरामद भएको सबैभन्दा ठूलो परिणामको सुन हो । सुनबारे थप अनुसन्धान गर्न राष्ट्र बैंक पठाउने तयारी भइरहेको छ । बरामद भएको सुनलाई सुरुमा केन्द्रीय बैंकको टक्सार माहाशाखामा पठाउने गरिन्छ । त्यहाँ सुनमा रहेको मिसावट र शुद्धताबारे अनुसन्धान गरिन्छ ।

अहिलेसम्म नेपाल राष्ट्र बैंकमा नपठाएको र आवश्यक प्रक्रिया पुर्याएर पठाउने तयारी भइरहेको ढुंगानाले जानकारी दिए ।