पोखरा । पोखरा अन्तर्राष्ट्रिय विमानस्थल (पिआइए) मा ६ असारमा पहिलो अन्तर्राष्ट्रिय उडान हुने भएको छ ।

स्रोतका अनुसार चीनबाट दुईवटा चार्टर विमान पोखरामा अवतरण गर्ने तय भइसकेको छ । विमानस्थल सञ्चालनमा आएको १७१औँ दिनमा अन्तर्राष्ट्रिय चार्टर उडान हुन लागेको हो । उक्त दिन उत्तरी छिमेकी मुलुक चीनको छेन्दुबाट चिनियाँ वायुसेवा कम्पनी सिचुवान एयरलाइन्सको विमान पोखरा अन्तर्राष्ट्रिय विमानस्थलमा अवतरण गर्ने भएको हो ।

नागरिक उड्डयन प्राधिकरणले सिचुवान एयरलाइन्सलाई ६ असारमा चार्टर्ड अवतरणका लागि अनुममति दिएको छ । १७ माघ ०७९ मा प्रधानमन्त्री पुष्पकमल दाहाल ‘प्रचण्ड’ ले विमानस्थल उद्घाटन गरेका थिए ।

नेपाल नागरिक उड्डयन प्राधिकरणका अनुसार पोखरामा नियमित उडानका लागि समेत कम्पनीसँग छलफल भईरहेको छ । पोखरामा हुने ‘बोट रेस’ प्रतियोगितामा भाग लिने खेलाडीहरु बोकेर सिचुवानको जहाज पोखरा अवतरण गर्नेछ । यो पोखरा अन्तर्राष्ट्रिय विमानस्थलको पहिलो अन्तर्राष्ट्रिय उडान हुनेछ ।