काठमाडौं । नेपालका क्रिकेटर सन्दीप लामिछानेले विश्व कीर्तिमान रच्ने तरखरमा छन् । । सोमबार पपुवा न्युगिनीलाई नेपालले ९५ रनमा अलआउट गर्दा सन्दीपले पाँच विकेट लिए । उनै सन्दीप प्लेयर अफ द म्याच पनि चुनिए । सन्दीपले लिएको यो पाँच विकेटसँगै उनी विश्व कीर्तिमान नजिक पुगेको छन् । अब उनले दुई विकेट लिए ओडीआईमा सबैभन्दा छिटो सय विकेट लिने राशिद खानको विश्व कीर्तिमान बराबरी गर्नेछन् । त्यस्तै, तीन विकेट लिए उनले राशिदको त्यो दुर्लभ विश्व कीर्तिमान भंग गर्दै आफ्नो नाममा राख्ने छन् ।

राशिदले ४४ खोलमा १०० विकेटको विश्व कीर्तिमान राखेका थिए । उनले सन् २०१८ मा वेष्ट इन्डिजविरुद्ध एक विकेट लिएसँगै यस्तो विश्व रेकर्ड राखेका थिए । उनले यसअघि अस्ट्रेलियाका मिचेल स्टार्कको रेकर्ड तोडेका थिए । स्टार्कले २०१६ मा ५२ खेलबाट सय विकेट पूरा गरेका थिए ।

बिहीबार नेपालले यूएईविरुद्ध खेल्दैछ । सन्दीपले बिहीबार नै यूएईविरुद्धको खेलमा राशिदको रेकर्ड भंग गर्न सक्छन् । सन्दीप भन्छन्, ‘विश्व कीर्तिमानका लागि अझै पनि समय छ । अब आउने खेल हाम्रो लागि फाइनलसरह हो । गौरवान्वित लाग्छ नै । सुरुवात शून्यबाटै हुन्छ । गौरव हुन्छ नै मेरो परिवार टिम र सबैका लागि ।’

सन्दीपकै उत्कृष्ट प्रदर्शनमा पपुवा न्युगिनीविरुद्ध नेपालले सानदार जित निकाल्यो । सन्दीपले १० ओभरमा एक मेडन ओभर राख्दै २५ रन खर्चिएर पाँच विकेट लिए । पपुवा न्युगिनीविरुद्ध ९ विकेटको जितपछि सन्दीपले आफ्नो प्रदर्शनबाट खुसी रहेको बताए ।