काठमाडौँ । नेकपा एमालेसँगको सहमति विपरित राष्ट्रिय सहमतिमा राष्ट्रपति चयन गर्ने प्रधानमन्त्री पुष्पकमल दाहालको रटान असफल हुने संकेत देखिन थालेको छ । एकपछि अर्को गर्दै राष्ट्रपति पदका दाबेदारहरुको संख्या बढ्दै जान थालेपछि उनको रटान पुरै असफल हुने देखिएको हो । बुधबारसम्म आइपुग्दा फागुन २५ गते हुने राष्ट्रपति निर्वाचनका लागि दावी प्रस्तुत गर्ने दलहरुको संख्या ४ पुगेको छ ।

नेकपा एकीकृत समाजवादीको बुधबार सम्पन्न स्थायी समिति बैठकले राष्ट्रपति पदमा दाबी गर्ने निर्णय गरेसँगै दाबेदार दलहरुको संख्या ४ पुगेको हो । नेपाली काँग्रेस र नेकपा एमालेबाहेक यसअघि लोकतान्त्रिक समाजवादी पार्टीले समेत राष्ट्रपति आफ्नो पार्टीले पाउनु पर्ने भन्दै अभियान सञ्चालन गरेका थिए । काँग्रेस र एमालेले भावी राष्ट्रपतिको उम्मेदवारको नाम सार्वजनिक नगरे पनि लोसपाले पार्टी अध्यक्ष महन्थ ठाकुरलाई अघि सारेर सहमतिको प्रयासका लागि अभियान नै सञ्चालन गरेको छ । उसले मंगलबार र बुधबार प्रधानमन्त्री दाहाललगायत अन्य दलका शीर्ष नेताहरुलाई भेटेर राष्ट्रपतिमा ठाकुरका नाममा सहमति गर्न आग्रह गरेको थियो ।

नेकपा एसले भने अध्यक्ष नेपाल र एमाले अध्यक्ष केपी ओलीवीच सोमबार भेटवार्ता भएपछि राष्ट्रपति पदप्रति चासो देखाएको हो । पार्टी एकता गरे राष्ट्रपतिमा नेपाललाई सहयोग गर्न आप्mनो पार्टी तयार रहेको प्रस्ताव ओलीले भेटवार्तामा राखेको समाचार मंगलबार प्रवाहित भएका थिए । तर, हिजो बसेको स्थायी समिति बैठकमा नेपालले त्यसबारे मुख खोलेनन् । यद्यपि राष्ट्रपतिमा दाबी गर्ने निर्णय भने सो दलले गरेको छ ।