काठमाडौं । प्रहरी महानिरीक्षक बन्ने सपना बुनेर बसेका नेपाल प्रहरीका नायब महानिरीक्षक (डीआईजी) अशोक सिंह अन्ततः प्रहरी संगठनबाटै बाहिरिन पुगेका छन् । जन्म मिति र शैक्षिक योग्यताको प्रमाणपत्रबारे विवाद बढ्दै जाँदा सिंह पदबाट राजिनामा दिएर संगठनबाट बाहिरिएका हुन् । उनले बुधबार दिउँसो प्रहरी प्रधान कार्यालय पुगेर राजीनामा पत्र बुझाएका छन् ।

तर, उनको जन्म मिति र शैक्षिक योग्यताको प्रमाण पत्रलाई लिएर अख्तियार दुरुपयोग अनुसन्धान आयोगमा हालसालै मात्र उजुरी परेको थियो । सिंहको फरक–फरक जन्ममिति भेटिएको र शैक्षिक योग्यताको प्रमाणपत्र पनि नक्कली रहेको भन्दै उजुरी परेपछि अख्तियारले छानबिन अगाडि बढाएको थियो । अख्तियारमा परेको उजुरीबारे अनुसन्धान भइरहेको बुझिएको छ ।