काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले ७ दलको समर्थन र तीन स्वतन्त्र सांसदसहित सहित प्रधानमन्त्री बन्ने लगभग पक्का जस्तो भएको छ ।

राष्ट्रपतिसमक्ष १६९ सांसदको समर्थन लिएर प्रचण्डले प्रधानमन्त्रीको दाबी गरेका हुन् । सरकार बनाउन बहुमतका लागि १३८ सीट आवश्यक पर्छ । एमालेको ७८, माओवादीको ३२, राष्ट्रिय स्वतन्त्र पार्टीको २०, राष्ट्रिय प्रजातन्त्र पार्टीको १४, जसपाको १२, जनमत पार्टीको ६ र नागरिक उन्मुक्तिको ४ रहेको छ । स्वतन्त्र चारमध्ये ३ सांसदले समर्थन गरेका हुन् ।

स्वतन्त्र जितेका प्रभु शाह, अमरेशकुमार सिंह र किरण शाहले पनि एमाले नेतृत्वको गठबन्धनलाई समर्थन गरेका छन् । उनीहरू पनि शीतल निवास पुगेका छन् ।

प्रधानमन्त्रीमा प्रचण्डको नाम लिएर प्रचण्डसँगै, एमाले अध्यक्ष केपी शर्मा ओली, राष्ट्रिय स्वतन्त्र पार्टीका सभापति रवि लामिछाने, राप्रपा अध्यक्ष राजेन्द्र लिङदेन, जनमत पार्टीका अध्यक्ष सीके राउत, नागरिक उन्मुक्ति पार्टीका अध्यक्ष रञ्जिता श्रेष्ठ, जसपा अध्यक्ष उपेन्द्र यादवको हस्ताक्षर रहेको छ ।