काठमाडौंं । नेपाली पत्रकारहरुको छाता संगठन नेपाल पत्रकार महासंघले पहिलो पटक कर्णाली प्रदेशमा साधारणसभा आयोजना गर्ने भएको छ ।

महासंघको केन्द्रीय कार्यसमितिको आयोजना तथा सुर्खेत शाखाको आतिथ्यमा पुष ८ र ९ गते सुर्खेतको वीरेन्द्रनगरमा साधारणसभा आयोजना गर्न लागिएको हो। कार्यक्रमका लागि विभिन्न समिति र उपसमितिहरू निर्माण गरी तयारीमा लागेको महासंघले जनाएको छ । साधारणसभाको उद्घाटन राष्ट्रपति विद्यादेवी भण्डारीले गर्ने कार्यक्रम तय भएको महासंघले जनाएको छ ।

साधारणसभाबाटै महासंघको आगामी भावी कार्ययोजना निर्माण समेत गरिनेछ । एक हजार ३१६ साधारण सदस्य रहेकोमा यो अधिवेशनमा महासंघका ७७ जिल्ला शाखा, ३९ प्रतिष्ठान शाखा, १२ एशोसिएट शाखा, १० वैदेशिक शाखा र दुई आवासीय शाखा (नेजा र एन्जा) का पदाधिकारी सदस्य गरी ७५० राष्ट्रिय परिषद् सदस्यको सहभागिता रहने महासंघका महासचिव रोशन पुरीले जानकारी दिए ।