पोखरा । नेकपा एमालेका अध्यक्ष केपी शर्मा ओलीले गठबन्धन सरकारले अर्थतन्त्र ध्वस्त बनाएको र परराष्ट्र सम्बन्ध बिगार्ने काम गरेपनि सबै चुपचाप बसेको आरोप लगाउनु भएको छ ।

आज पोखरामा आयोजित कार्यक्रममा उहाँले सरकारले अर्थतन्त्र ध्वस्त बनाएको र परराष्ट्र सम्बन्ध पनि बिगारेको टिप्पणी गर्नुभयो । ‘‘यतिखेर देशको अर्थतन्त्र यस्तो हुँदा, परराष्ट्र सम्बन्ध बिग्रिँदा चुपचाप छन्। यसमानेमा केही बिग्रिएकै छैन,’ उहाँले भन्नुभयो ।

अध्यक्ष ओलीले एक हुल स्यालको प्रसङ्ग निकाल्दै भन्नुभयो, ‘स्यालको यस्तो धर्म हुन्छ, एउटा स्याल कराएको सुनेपछि सबैले ठाडो घाँटी लगाएर ‘हुहु’ गर्नुपर्छ नत्र टाउको फुटेर मर्छ । त्यस कारण दुनियाँभरिका प्रतिक्रियावादीहरू हाम्राविरुद्ध ठाडो घाँटी लगाएर हुहु गरे । त्यसको वैचारिक र व्यावहारिक ढङ्गले जवाफ दिनुपर्छ ।’

अध्यक्ष ओलीले नेकपा (एकीकृत समाजवादी) का अध्यक्ष माधव नेपालले एमालेबाट फुटेर नाम एकीकृत राखेको भन्दै कटाक्ष गर्नुभयो ।

आफू प्रधानमन्त्री हुँदा विरोधीले रुखबाट पात ओइलिएर झर्दा पनि विरोध गरेको अध्यक्ष ओलीले टिप्पणी गर्नुभयो । उहाँले भन्नुभयो, ‘हामी सरकारमा भयौं भने हाम्रा विरोधीले रुखबाट एउटा ओइलिएको पात झरे पनि यो सरकारको कमजोरीले रुखबाट पातहरु झर्न थाल्याछन्, चैतको महिनामा रुखहरु हेर त उजाड भएका भनेर उधुम मच्छाउँछन् ।’ सरकार संसदबाट बन्नुपर्ने भए पनि वर्तमानको सरकार अदालतको आदेशमा बनेको ओलीले बताउनुभयो ।