काठमाडौं । कृषि तथा पशुपंक्षी विकासमन्त्रीमा महेन्द्र राय यादवको चिठ्ठा नै परेको छ । अन्तिम समयमा उनी अर्का नेतालाई पाखा लगाउँदै उनी मन्त्री भएका हुन् । सर्लाही ४ बाट निर्वाचित सांसद् प्रमोद साह मन्त्री बन्ने निश्चित भइसकेको थियो तर अन्तिममा आएर महेन्द्रले जनता समाजवादी पार्टीका अध्यक्ष उपेन्द्र यादवलाई विन्ति गरेपछि साहको भाग खोसिएको हो ।
स्रोतका अनुसार महेन्द्रले उपेन्द्रसँग अब आफू बुढो भइसकेकाले फेरि अवसर पाइन्छ कि पाइदैन भन्ने टुंगो नभएकाले एकपटक जसरी भए पनि मन्त्री बनाइदिन आग्रह गरेका थिए । उनले मन्त्री नभए आफू राजनीतिबाट सन्यास लिने भन्दै उपेन्द्रसँग अनुनय विनय गरेका थिए । स्रोतले महेन्द्रले मन्त्री बन्नका लागि उपेन्द्रसँग अरु धेरै कुरा गरेको समेत जनाएको छ । महेन्द्र पटक पटक सांसद् र मन्त्री भइसकेका छन् । प्रमोद भनें पहिलोपटक सांसद् भएका हुन् । प्रमोदले राजनीति र समाज सुधार्न आफूसँग धेरै राम्रा योजना भएको बताउँदै आएका छन् । महेन्द्रले मन्त्रीको स्वाद चाखिसकेकाले पनि उनी जसरी भए पनि मन्त्री हुनैपर्छ भनेर लागेका हुन् । महेन्द्रले जनताको र किसानको पक्षमा काम गर्न नसकेको भन्दै प्रधानमन्त्री शेरबहादुर देउवा असन्तुष्ट छन् । यसबारेमा देउवाले पार्टी अध्यक्ष यादवलाई पनि जानकारी गराएका छन् । तराइका किसानहरु पनि कृषि गर्न उपयुक्त वातावरण नभएको, समयमा मल र बिउ नपाएको, उत्पादित सामग्रीको मूल्य नपाएको भन्दै पटक पटक आन्दोलनमा उत्रेका छन् । मन्त्री यादवले यसबारेमा कुनै पनि चासो देखाएका छैनन् । प्रधानमन्त्री नै असन्तुष्ट भएका र पार्टी अध्यक्षसँग पनि प्रधानमन्त्रीले गुनासो गरिसकेपछि मन्त्री खुस्किने डरले उनी विभिन्न नेतासँग मन्त्री पद जोगाइदिनुप¥यो भन्दै भनसुनमा लागेका छन् ।