चितवन । नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले देशको सार्वभौमसत्ताको रक्षा र विकासका लागि एमालेको एकल बहुमतको सरकार आवश्यक भएको बताएका छन् ।
पार्टीको १० औं महाधिवेशन उद्घाटन समारोहलाई सम्बोधन गर्दै ओलीले जनादेशका लागि जान खोज्दा रोकिएको स्मरण गरे । अरु राजनीतिक शक्तिहरुले जनतामा जान डराएर चुनाव रोकेको बताउँदै ओलीले केही समयपछि नै अब चुनाव हुने र एमालेको सरकार बन्ने बताए । उनले महाधिवेशनपछि आफ्नो पार्टी चुनावको तयारीमा लाग्ने पनि बताउनुभयो । ओलीले भने, ‘निकट भविष्यमा चुनावहरू आउँदैछन् । म भन्न चाहन्छु, हामी अब चुनावको तयारीतर्फ पनि जानेछौं । जनमतको तयारी गर्नेछौं ।’
देशको सार्वभौमसत्ता र लोकतनत्रको रक्षाको लागि एमालेको बहुमत चाहिएको भन्दै ओलीले आउने चुनावपछि एमालेको सरकार बन्ने र अधुरा काम पुरा गर्ने समेत बताए ।
ओलीले एमालेलाई नभई देशको विकास गर्न बहुमत आवश्यक रहेको बताए । ओलीले आफुलाई हिजो काम गर्न नदिनेहरुले नै वर्तमान प्रधानमन्त्री देउवाको पनि खुट्टा समाइरहेकोले देउवा नेतृत्वको सरकारले केही गर्न नसक्ने बताए ।