काठमाडौं । राजनीतिक अस्थिरता बढ्दै जाँदा पूर्वराजा ज्ञानेन्द्रको पक्षमा आवाज उठाउनेहरु सल्बलाउन थालेका छन् । ज्ञानेन्द्रलाई राजा नै मान्दै आएका उनीहरु गणतान्त्रिक व्यवस्था जनताको भावनाविपरीत भएको र यसले निकास दिन नसक्ने पक्षमा देखिएका छन् ।
पूर्वराजाले भनें आफ्नो सक्रियता देखाएका छैनन् । उनी जनताले फेरि पनि आफ्नो महत्व बुझे भने राजा भएर फर्केर आउने भन्दै आएका छन् । नेपालमा गणतन्त्र घोषणा भएपछि विवादरहित ढंगले दरवार छोडेर हिँडेका ज्ञानेन्द्रको पक्षमा विभिन्न अभियानहरु चलिरहेका छन् । ती अभियानमा ज्ञानेन्द्रको कुनै समर्थन र सहयोग नभए पनि मानिसहरु स्वतस्फूर्त ढंगले लागेका छन् । वर्तमान राजनीतिक अवस्था संकटग्रस्त भएकाले उनीहरु राजसंस्थामात्र एकमात्र विकल्प हो भन्दै आएका छन् । दलहरुले जनताको भावनाविपरीत काम गरेकाले पनि यी दलहरुभन्दा त राजसंस्था नै ठिक रहेछ भन्ने एक ढंगको मानसिकता पनि मानिसहरुको रहेको बुझिन्छ । राजसंस्थाले कहिल्यै पनि देशको अहितमा काम नगर्ने भएकाले पनि मानिसहरुले त्यो विकल्प रोज्न थालेका हुन् । गणतन्त्र र संघीयता पनि देशको लागि अफाप भइसेकेको छ । गणतन्त्रका नाममा राजनीतिमा गरिएको मनपरी र संघीयताले देश र भूगोललाई विभाजन गरेकाले पनि आम मानिसमा यो व्यवस्थाप्रति अरुची बढ्नु स्वाभाविक नै हो । पूर्वराजा भनें आफ्नो अभियानमा सहयोग गर्नेलाई धन्यवाद दिँदै बसेका छन्, उनले तत्काल राजा भएर फर्किने सोचे पनि नसोचे पनि समयले अवश्य पनि आफ्नो पक्षमा माहौल बनाउला भन्नेमा उनी आशावादी भएका छन् ।