काठमाडौं । देउवा प्रधानमन्त्री भएको १ सय दिन पुगेको छ । यो समयलाई ‘हनिमुन पिरियड’ भनिन्छ । यो समयमा सरकारले खासै नराम्रो काम गरे पनि विरोध गर्न नहुने र सच्चिने मौका दिने प्रचलन नै छ तर देउवाको यो समय पनि त्यत्तिकै बितेको छ ।
देउवाले केही राम्रो काम गरेर आफ्नो छाप राख्नुपर्नेमा बदनामीमात्र कमाएका छन् । संविधान र विधानविपरीत काम गर्दै आएका देउवालाई न त जनताको समर्थन छ न त अन्तर्राष्ट्रिय जगतको नै । सर्वोच्च अदालतको परमादेशको आधारमा प्रधानमन्त्री भएका उनले देशको हितमा भन्दा पनि आफ्नो स्वार्थमा मात्र सरकारलाई दुरुपयोग गर्दै आएका छन् । सरकारलाई पूर्णता दिन नै ८८ दिन लगाएपछि उनलाई हेर्ने जनताको नजर नै राम्रो भएन । उनले सत्तारुढ गठबन्धनबीच नै सहमति खोज्न सकिरहेका छैनन् । आपसी सहमतिको अभावमा सरकार कसरी चल्ने हो त्यसबारे कुनै दृष्टिकोण आउन सकेको छैन । सत्तारुढबीच विभिन्न स्वार्थ भएकाले देउवाले कसैलाई पनि चित्त बुझाउन सकिरहेका छैनन् । आफ्नै सरकार घाँडो भएकाले उनी समयभन्दा अघि नै ‘अर्ली इलेक्सन’ गर्ने सोचमा पुगेका छन् । उनले यसबारे सत्तारुढ दलसँग छलफल गर्ने समेत जनाएका छन् ।
देउवाले आफ्नै पार्टीभित्र पनि चित्त बुझ्ने गरी सरकार चलाउन सकेका छैनन् । देउवाले गरेका प्रत्येक काम कारबाहीमा पार्टीका नेताहरुले विरोध जनाउँदै आएका छन् । देउवाले सरकारलाई कमाउने र पार्टीको महाधिवेशनमा पैसा खर्च गर्नुका साथै सत्ताको आडमा सभापति जित्ने दाउ गरेका छन् । देउवाले सभापति हुनका लागि जस्तोसुकै उपाय पनि अपनाउने भएका छन् ।