काठमाडौं । राप्रपा नेपाल र जनताको पार्टी नेपालबीच एकता हुने भएको छ । यी दुवै पार्टी निर्वाचन आयोगमा दर्ता भएका छन् ।
राप्रपा नेपालका राष्ट्रिय अध्यक्ष प्रदीपविक्रम राणाले केही दिनमै एकता हुने जनाए । ‘कोरोनाको दर अलिकति घटेर वातावरण सहज हुनेबित्तिकै पार्टी एकता हुन्छ लगभग सबै तयारी पूरा भइसकेको छ’ उनले भने ‘अहिले हामी दुईवटा पार्टी मिल्ने हो त्यसपछि हामीसँग विचार र सिद्धान्त मिल्ने अन्य दललाई पनि एकतामा ल्याउँछौं ।’ राप्रपा नेपाल फरक सिद्धान्त लिएर राजनीतिमा अघि बढेको छ । उसले कोरोनाको यो संकटमा आफ्नो तर्फबाट झण्डै ३ हजार जनालाई उपत्यकाका विभिन्न ठाउँमा पुगेर खाना वितरण गरेको थियो ।
जनताको पार्टी नेपालका अध्यक्ष घनश्याम भण्डारी र प्रवक्ता श्यामबहादुर सापकोटाले एक विज्ञप्ती प्रकाशित गरी देशको सार्वभौमिकता, राष्ट्रिय अखण्डता जोगाइराख्नका लागि देशभक्त प्रजातान्त्रिक शक्तिहरु एकता एकीकरण र चलायमान हुनुको विकल्प नभएकोले राप्रपा नेपालसँग एकता गर्न लागेको जनाएको छ । जनताको पार्टी नेपालले सत्य, अहिंसा, त्याग, शान्ति, प्रजातन्त्र र विकास, अनुशासित प्रजातन्त्र संवैधानिक राजतन्त्रबाटै समृद्धिशाली बन्छ नेपाल’ भन्ने मूल नारालाई आत्मसात गरेको छ ।