गंगा बराल
काठमाडौं । नेपाली शव्दकोषमा प्रतिगमन भन्नाले पछाडि फर्किने भनेर भनेको छ । प्रधानमन्त्री खड्गप्रसाद ओली पनि पछाडि फर्किएका छन् । उनले गरेको प्रतिनिधिसभा विघटनलाई सर्वोच्च अदालतले वदर गरिदिएपछि ओली र उनका गुटका मान्छे अलमलमा परेका छन् । संविधानको सबै प्रक्रियालाई मिचेर आफ्नो प्रधानमन्त्रीको कुर्सीमात्र केही समयलाई भए पनि जोगाउने दाउमा रहेका ओलीको सपना पनि चकनाचुर भएको छ ।
आफूसँग झण्डै दुई तिहाई सांसद भएको प्रतिनिधिसभा विघटन गरेर ओलीले नालायक शासक घोषणा गरेका थिए । पार्टीभित्रै अर्को पक्षको अवरोध भएको र कहिल्यै पनि काम गर्न नदिएको भन्दै आएका उनले अहिलेचाहिँ के उपलव्धि पाए भनेर पनि चर्चा गर्न थालिएको छ । ओलीले सर्वोच्चको निर्णय मान्ने भन्दै आए पनि देशलाई सर्वोच्चले संकटमा पारेको पनि भन्न भ्याएका छन् । ओलीले अब संसदमा र सरकारमा आफू कसरी अघि बढ्ने भन्ने रणनीति बनाउन बाँकी नै छ । देशलाई स्थिरता दिन, शान्ति कायम गर्न संविधानको रक्षा गर्न र विधिको शासनका लागि आफूले साहसिक निर्णय गरेको भनेर ओलीले जति नै आदर्शका कुरा गरे पनि जनताले अब भनें त्यसलाई पत्याउन छोडिसकेका छन् । ओलीले गत पौष ५ गते राष्ट्रपतिकहाँ प्रतिनिधिसभा भंगको सिफारिस गरेपछि नै उनी एकपछि अर्को रुपमा कमजोर बनेका हुन् । भइरहेको र चलिरहेको एउटा प्रक्रियालाई मिचेर अर्को बाटोबाट गएर निकास खोज्छु भन्ने ओलीको कदम कुनै पनि अर्थमा सही नभएको स्पष्ट रुपमा बुझ्न सकिन्छ ।
ओलीका मान्छेहरुले आफूहरु भद्र भएकाले मात्र सिस्टम बचेको प्रतिक्रिया दिँदै आएका छन् । उनीहरुले अरुले गरेको निर्णय सर्वोच्च अदालतले उल्ट्याइदिएको भए यतिबेला सडक आन्दोलन भइसक्नेसमेत बताउँदै आएका थिए । सर्वोच्चले गरेको सही निर्णयको पक्षमा जनता छन् । सर्वोच्च अदालतप्रति मानिसको विश्वास पनि बढ्न थालेको छ । ओलीले कुनै पनि हालतमा प्रतिनिधिसभा पुनस्र्थापना हुँदैन भनेर भाषण ठोकिरहँदा मानिसहरु पनि अलमलमा थिए तर सर्वोच्चबाट आएको आकस्मिक फैसलाले ओली गुट रिसाए पनि राजनीतिक वातावरण भने सहज बन्दै गएको छ । अहिले आएर ओलीले आफ्नो सरकार टिकाउन अनेक चालवाजी गरिरहेका छन् । सरकार संकटमा पर्दै गएपछि उनले सरकारी संयन्त्र प्रयोग गर्ने दाउमा छन्, ओली र उनका प्रतिनिधिले सांसदलाई जे चाहियो त्यही दिने भनेर अफर गरेका समाचार पनि बाहिरिएका छन् ।
ओलीले जति नै चर्का भाषण गरे पनि अब उनीसँग कुनै विकल्प नरहेकाले उनी आफूलाई र सरकार टिकाउन जस्तोसुकै कदम चाल्न पनि तयार भएका छन् ।