सहानुभुति बटुल्न खोज्दै ओली
काठमाडौं । प्रधानमन्त्री खड्गप्रसाद ओली आफू समस्यामा परेपछि अनेक शव्दको जाल फाल्ने गर्छन् । आफूले गरेका काम जनताको पक्षमा नभएको बुझेपछि उनले आफूलाई चोख्याउने हरेक प्रयत्न गर्दै आएका छन् ।
ओलीले गत सोमबार पोखरा पुगेर आफूलाई ज्यानको असुरक्षा भएको बताए । गृहमन्त्री ओलीकै गुटका नेता छन् । उनले आफू जतिसुकै बेला पनि असुरक्षित रहेको भनेर सहानुभुति बटुलेका छन् । गृहमन्त्री रामबहादुर थापा पनि सँगै रहेका बेला ओलीले दिएको यो अभिव्यक्तिलाई निकै रहस्यका साथ हेरिन्छ, यसको अर्थ सरकार प्रधानमन्त्रीको पनि शान्ति सुरक्षा कायम गर्न सक्दैन भने जनताको अवस्था के होला । ओलीले आफूले देश र जनताको पक्षमा राम्रो काम गरेकाले त्यो सफलता हेर्न नसक्ने तत्वले आफूविरुद्ध चलखेल गरेको पनि आरोप लगाए । ओली अगाडि पछाडि सयौैंको संख्यामा प्रहरी र सेना दौडाएर हिँड्ने गर्छन्, यो अवस्थामा पनि उनी कसरी असुरक्षित हुन्छन् भन्ने प्रश्न पनि उब्जिएको छ ।
ओलीले यस्तो भनाई राखेपछि यसबारे क्रिया प्रतिक्रिया सुरु भएको छ । ओली सधैं शव्द र व्यवहारबाट मान्छेलाई अल्मल्याउने र आफ्नो कुकर्मलाई ढाकछोप गर्ने प्रयास गर्दै आएका छन् । कुनै एउटा विषय उठाइदिएर जनतालाई त्यसको पछि दौडाउने काम गर्छन् उनी । ओलीले सरकारले तीन वर्षमा उल्लेखनीय काम गरेकाले अस्थिरता मच्चाएर स्वार्थ लुट्न खोज्ने तत्वहरु पनि पाखा लागेको समेत दाबी गरेका छन् ।
पार्टीमा संकट पर्दै गएपछि विरामी भएको बहाना गरेर अस्पताल जान पनि ओली पछि परेका थिएनन् यसअघि । प्रतिनिधिसभा विघटन गरेर राम्रो गरेको दाबी गर्दै आएका उनलाई सर्वोच्चले अस्विकार गरेपछि नराम्ररी तड्पिएका छन् । उनी अहिले उद्घाटन र शिलान्यास अभियानमा देश दौडाहामा छन् । असुरक्षित महसुश हुँदा पनि अनावश्यक रुपमा किन सरकारी सम्पत्तिको दुरुपयोग गरेर दौडनुपरेको होला भनेर पनि मानिसहरुले प्रश्न गर्न थालेका छन् । प्रधानमन्त्री पद खुस्किन लागेर तनावमा भएपछि आफ्नो नाम इतिहासमा राख्न उनी सक्रिय बन्दै गएको पनि टिप्पणी गर्न थालिएको छ ।