सेतीदेवी दुग्ध उत्पादक सहकारी संस्थाले अब उन्नत जातका गाई पालन गर्ने भएको छ । सहकारी दूध सङ्कलनमा मात्र सीमित नभई आफैँ गाई पालन गर्न गोठ निर्माण गरिरहेको सहकारी अध्यक्ष तिमिल्सिनाले जानकारी दिए  । सहकारीको सामूहिक लगानी तथा नेपाल सरकार कृषि तथा पशुपन्छी विकास मन्त्रालय अन्तर्गत नेपाल लाइभस्टक सेक्टर इनोभेसन आयोजनाको अनुदानमा सहकारीले गाई पालन गर्न लागेको हो ।

उक्त आयोजनाले कृषिको विकासका लागि सहकारी र समूहमार्फत व्यवसाय गर्ने किसानहरूलाई अनुदान दिने भएको छ । विश्व बैंकको ५५ मिलियन डलर सहुलियत पूर्ण ऋण सहयोगमा सञ्चालित आयोजनाले पशुजन्य पदार्थहरूको उत्पादकत्व तथा मूल्य शृङ्खलामा वृद्धि र छनौट गरिएका पशुजन्य वस्तुहरू (दूध, मासु, पश्मिना) मा आधारित साना किसान तथा उद्यमीहरू लगायतको समयानुकूलतालाई सुधार गर्ने लक्ष्य लिएर काम गरिरहेको छ ।

यस अघि सरकारले दिने अनुदानका रकमहरू दुरुपयोग हुने गरेको भन्दै विरोध हुने गरेको छ । त्यसैलाई मध्यनजर गर्दै यो पटक समूह सहकारीलाई अनुदान दिने नयाँ अध्यास सुरु गरिएको आयोजनाका कृषि विज्ञ सुशील खड्काले बताए । कृषि समूहहरूले आफ्नो फाइदाका लागि सामूहिक व्यवसाय गरे पनि संस्था रूपमा भने यो एक नमुना अभ्यास हो ।

त्यसैले पनि आयोजनाले पाँच प्रदेशका २८ जिल्लाका विभिन्न स्थानीय तहका २७९ सामुह तथा सहकारीलाई ५० प्रतिशत अनुदान उपलब्ध गराउने छ । यो आयोजनाको कार्यक्रम अनुसार सुरुमा भौतिक कार्य सम्पन्न गर्नु पर्ने प्रावधान रहेको छ । यस सहकारीमा संस्थाका सबै सदस्यहरूको २० प्रतिशत आफ्नो लगानी रहेको छ भने ३० प्रतिशत बैंकबाट ऋण लिनु पर्ने प्रावधान छ । बाँकी ५० प्रतिशत नेपाल लाइभस्टक सेक्टर इनोभेसन आयोजनाले दिने गर्छ ।