गोरखा । गोरखाको सिरानचोक गाउँपालिका ८ फिनामस्थित लुगाधुने खोला खानेपानी आयोजनाको सोमबार उद्घाटन गरिएको छ ।
गण्डकी प्रदेश सरकारद्वारा निर्मित आयोजनाको एक समारोहबीच गोरखा २ को (ख) बाट निर्वाचित कांग्रेस सांसद दवाडीले उद्घाटन गरेका हुन् । एक करोड ४७ लाख रुपैयाँको लागतमा निर्माण भएको सो आयोजनाबाट १ सय ३८ घरधुरी रहेको फिनाम गाउँका आठसय जना उपभोक्ता लाभान्वित हुने छन् । खानेपानीका लागि लामो समयदेखि दुःख भोग्दै आएका सो गाउँका गाउँलेले ‘एक घर एक धारा’ कार्यक्रम अन्तर्गत घरघरमा पानी पाएपछि खुशी भएका नेपाली कांग्रेसका वडा नम्वर ८ सचिव गणेश ढकालले जानकारी दिए ।
सो अवसरमा गाउँपालिकाका प्रमुख राजु गुरुङ, उपप्रमुख रीता देवकोटालगायतले मन्तव्य व्यक्त गरेका थिए । ‘मेरो राजनीति समाजसेवाका लागि, मेरो राजनीति तपाइहरुको सेवाको लागि’ भन्ने मुख्य नारा बनाएका उनले यो नारालाई सार्थक बनाउँदै लगेका छन् । उनले सांसद् भएबापत आउने तलव गाउँघरको विकास निर्माणमा खर्च गर्दै आएका छन् । उनले विद्यालय, आमा समूह, कृषि समूह, विभिन्न संघ संस्थाका साथै मठ मन्दिर र समुदायमा आफ्नो तर्फबाट व्यक्तिगत सहयोग पनि गरेका छन् ।