काठमाडौं । राष्ट्रिय लोकतान्त्रिक प्राध्यापक संघको यही चैत्र ४ गते १३औं वार्षिकोत्सव र संगठन समायोजन कार्यक्रम सम्पन्न भएको छ । उक्त संगठन समायोजन कार्यक्रम जसपाका अध्यक्ष महन्थ ठाकुरको प्रमुख आतिथ्यमा सम्पन्न भएको संघले जनाएको छ ।
पत्रकार सम्मेलनको आयोजना गरेर कार्यक्रममा समाजवादी प्राध्यापक मञ्च र राष्ट्रिय लोकतान्त्रिक प्राध्यापक संघको समायोजन सम्पन्न भएको जनाईएको हो । उप–प्राध्यापक डा. उदयकिशोर तिवारीको नेतृत्वमा ६३ सदस्यीय समिति पनि गठन भएको छ ।
कार्यक्रममा राष्ट्रिय लोकतान्त्रिक प्राध्यापक संघका अध्यक्ष उप–प्राध्यापक डा. उदयकिशोर तिवारीले समाजवादी प्राध्यापक मञ्च र रालोप्रासंबीच समायोजन भएको बताए । उनले दुई शक्ति एक भएको भन्दै खुशी व्यक्त गरे । उनले समाजवादी प्राध्यापक मञ्च र लोकतान्त्रिक प्राध्यापक आज संघ एक भएको भन्दै अन्य विभिन्न विश्वविद्यालयका प्राध्यापकहरुलाई आवद्व हुनसमेत आग्रह गरे ।
विश्वविद्यालयका पदाधिकारीहरुले राम्रा र योग्य भन्दापनि आफ्ना मान्छेलाई नियुक्ती गर्दा विश्वविद्यालयप्रतिको विश्वासमा संकट पैदा हुन थालेको उप–प्राध्यापक डा. तिवारीको भनाई छ । उनले जोड दिँदै भने,‘अब तीनवटा प्राध्यापक शक्तिहरुको बीचमा सहमति गरेर अगाडी बढाउँदा विश्वविद्यायलको हित हुन्छ ।’
कार्यक्रममा बोल्दै संघका महासचिव तथा उप–प्राध्यापक उदयकुमार कर्णले चैत ४ गते सम्पन्न वार्षिकोत्सव कार्यक्रममा लोकतान्त्रिक प्रध्यापक संघ र समाजवादी प्राध्यापक मञ्चबीच एकता सम्पन्न भएको बताए । उनले भने, ‘लोकतान्त्रिक प्रध्यापक संघ विशुुद्व रुपमा उच्च शिक्षा विश्व विद्यालयमा अध्यापन गर्ने एउटा प्रागिक संस्था हो ।’ उनले उच्च शिक्षामा समावेसी र समानुपातिक प्रवेशको सुनिश्चित्ता लगायत शैक्षिक आदर्शप्रति समर्पित भएर लागेको संस्था भएको जिकिर गरे ।
संघका उपाध्यक्ष तथा सह–प्रध्यापक डा.अरुण कुमार ठाकुरले प्रध्यापक संघ विश्व विद्यालयमा स्थापित तेस्रो शक्तिको रुपमा रहेको बताए । उनले भने,‘प्राध्यापक संघलाई वैकल्पिक शक्तिको रुपमा अगाडी बढाउन चाहन्छौँ ।’ विश्वविद्यालयमा क्वालिटेटिभ लिडरसिप र भीजनको कमी भएको उनले औल्याए । थिंक ट्याङकलाई लिएर अगामी दिनमा थुप्रै नीतिहरूले ल्याउने समेत उनले जानकारी दिए । ठाकुरले कार्यक्रममा प्रेस विज्ञप्ति पढेर सुनाएका थिए ।
संघका अर्का उपाध्यक्ष तथा उप्र–प्राध्यापक अशोक थापाले राजनीतिक रुपमा प्राध्यापकहरु एउटा सचेत समूदाय रहेको बताए । उनले भने,‘राजनीतिक रुपमा पनि हामी विभिन्न दललाई प्रत्यक्ष वा अप्रत्यक्ष रुपमा समर्थन गर्छौँ ।’