काठमाडौँ । प्रधानमन्त्री केपी शर्मा ओलीले आफूले कसैले हटाउन सक्छ भने हटाओस् भन्दै चुनौती दिएका छन् । आज मंगलबार झापास्थित पूर्वाञ्चल क्यान्सर अस्पतालको उद्घाटन समारोहमा बोल्दै उनले अहिलेको सरकार नेपालीको लागि कम्फर्टेबल रहेको भन्दै यस्तो चुनौती दिएका हुन् । उनले आफूलाई हटाउन सजिलो नहुने पनि बताए ।
‘मलाई अहिले पनि कसैले हटाउन सक्छ भने हटाओस्,’ उनले भने, ‘ डेढ दुई वर्षपछि चुनाव आउँछ । दुई तिहाइका साथ सिंहदरबारमा फर्किन्छु ।’ उनले फागुन २३ गते बस्ने प्रतिनिधि सभाको बैठक बोलाएको भन्दै सर्वोच्च अदालतको फैसलाको परीक्षणको समय आएको पनि बताए । ओलीले गत पुस ५ गते गरेको प्रतिनिधि सभा विघटनलाई बदर गर्दै सर्वोच्चले संसद् पुनःस्थापना गरेको थियो । ओलीले आफूले नेतृत्व गरेको सरकार नेपाली जनताको लागि कम्फर्टेबल भएको भन्दै नेकपा दाहाल(नेपाल समूहका अध्यक्ष पुष्पकमल दाहाललाई व्यंग्य पनि गरे ।