काठमाडौं, चैत्र २२ । मानव अधिकार तथा शान्ति प्रतिष्ठान नेपालले जेनजी आन्दोलनका बारेमा गौरीबहादुर कार्की नेतृत्वको आयोगले दिएको प्रतिवेदनका आधारमा पूर्वप्रधानमन्त्री तथा नेकपा एमालेका अध्यक्ष केपी शर्मा ओली र पूर्व गृहमन्त्री रमेश लेखकलाई गृहमन्त्री सुधन गुरुङको आदेशमा पक्राउ गरिएकोमा आपत्ति जनाएको छ ।

प्रतिष्ठानका अध्यक्ष मानबहादुर थापाले चैत्र १९ गते एक विज्ञप्ती जारी गरी आफूहरुको गम्भीर ध्यानाकर्षण भएको जनाएका छन् । प्रतिष्ठानले आन्दोलनको पक्षमा लागेर हिँडेका कार्कीसमेत विवादित व्यक्ति भएको पनि जनाएको छ । प्रतिष्ठानले प्रतिवेदन पूर्वाग्रही र एकपक्षीय भएको भन्दै विज्ञप्तीमा खण्डन गरेको छ । प्रतिष्ठानले २००७ सालदेखि २०६२÷६३ सालसम्मको विभिन्न आन्दोलनका क्रममा छानविन आयोगले तयार पारेको प्रतिवेदन कार्यान्वयन नभएकोतर्फ पनि ध्यानाकर्षण गराएको छ ।

प्रतिष्ठानले गैरकानुनी ढंगले पक्राउ गरिएका ओली र लेखकलाई तत्काल रिहा गर्न माग गरेको छ । मानवअधिकारको सम्मान गर्न आग्रह गर्दै प्रतिष्ठानले भनेको छ–‘आगामी दिनमा सरकारले दुई तिहाइको भरमा राष्ट्रघात हुने वा राष्ट्रिय स्वाधीनतामा आँच आउने गरी सन्धीसम्झौता नगर्न, पञ्चशीलताको आधारमा परराष्ट्रनीति अवलम्बन गर्न हाम्रो संस्था जोडदार माग गर्दछ ।’ प्रतिष्ठानले अन्तर्राष्ट्रिय कानुन तथा मापदण्डको विरुद्धमा कलिला विद्यार्थीलाई ड्रेससहित आन्दोलनमा जान प्रेरित गर्नु पनि गलत भएको निश्कर्ष निकालेको छ ।