बुबा नरबहादुर प्रधान र आमा पुनम प्रधानकाे काेखमा सन् २००१ को जुलाई १० तारिखमा भारतको सिक्किम राज्यको सदाम भन्ने ठाउँमा जन्मेकी हुन प्रतीक्षा प्रधान । कला क्षेत्रमा लाग्न प्रेरणा दिने आफ्नाे आमा बुबा मान्नु हुने प्रतिक्षा प्रेरणा भन्नाले त्यो शक्ति हो जसले भित्रको क्षमता देख्छ, विश्वास गर्छ र अगाडि बढ्न हौसला दिन्छ भन्दै जीवनमा यस्ता प्रेरणा दिने पहिलो व्यक्ति आमा र बुबालाई मान्नु हुन्छ । आमा बुबाले अनेकौं चुनौतीहरूका बाबजुद पनि आफूलाई सधैं साथ दिनुभयो, आत्मविश्वासी बनाउनु भयो र ठूलो सपना देख्न सिकाउनुभयो । त्यसैगरी, “बरा अर्थात् बुबाको ठूलो दाजुलाई पनि गहिरो कृतज्ञता व्यक्त गर्न चाहन्छु, जसले मेरो क्षमता चिने र सदैव माया, विश्वास र समर्थन दिनुभयो । उहाँको विश्वासले मलाई अझ दृढ र समर्पित बनायो । मेरो दाजु र दिदी पनि मेरो जीवनका बलियो खम्बा हुन्, जसले कठिन समयमा मेरो साथ दिएर मलाई अघि बढ्न सहयोग गर्नुभयो । साथै, म आफूजस्तै पृष्ठभूमिबाट आएका तर आत्मबल र मेहनतको बलले अघि बढेका महिला व्यक्तित्वहरूबाट पनि गहिरो प्रेरणा लिन्छु । उहाँहरूले देखाउनुभयो कि साँचो समर्पण, धैर्यता र आत्मविश्वासले हरेक सपना पुरा गर्न सकिन्छ ।” प्रतिक्षा बताउँछिन् ।

कला, संगीत र अभिनय भनेको आत्मविकास, प्रतिभा अभिव्यक्ति र सामाजिक सन्देश दिने शक्तिशाली माध्यम बताउने प्रतिक्षा यसले मानिसको आत्मविश्वास र नेतृत्व क्षमता विकास गर्छ र सकारात्मक सोचलाई बलियो बनाउने र कलाकारहरूले समाजमा गहिरो प्रभाव पार्ने भएकाले सबैले कलाकार र उनीहरूको योगदानको मूल्यांकन गर्नुपर्ने बताउँछिन् ।

पहिलो यात्रा सुरु हुनु अघि आफ्नाे जीवनका केही चुनौतीहरू बाँड्दै बाल्यकालमा आमा बुबाबाट टाढा स्कुलमा बसेकि र आफू उमेरभन्दा अग्ली देखिने र अरूले प्रतिक्षालाई जिस्क्याउने गर्दथे, जसले आफ्नाे आत्मविश्वासलाई चोट पुर्‍याएकाे तर कलेज पुगेर जीवनमा सकारात्मक परिवर्तन आएको र केही असल साथी र मार्गदर्शकको सहयोगले उनले आफ्नो वास्तविक क्षमता चिन्न थालेकि बताउँछिन् । आमा-बुबा सधैं आफ्नाे साथमा रहनुहुन्थ्यो र दाजु-दिदी उनकाे लागि बलियो खम्बा बनेर उभिएको स्मरण गराउँछिन् उनी । उनीहरूको माया र समर्थनले आफूलाई फेरि आत्मविश्वासी बन्न मद्दत गरेकाे र त्यसपछि आफूले सौन्दर्य प्रतियोगितामा पाइला बताउने प्रतिक्षाकाे कला क्षेत्रमा औपचारिक सुरुवात सन् २०२२ मा ‘मिस नेवा सिक्किम’ बाट भयो, जुन सिक्किम नेवा गुथीद्वारा आयोजना गरिएको थियो । त्यो यात्रा उनकाे आत्मखोज, संघर्ष र सपनाको सुरुवात थियो।

यो क्षेत्रमा सबैले जीविकोपार्जन गर्न सक्ने अवस्था नरहेकाे तर केही भाग्यशाली र प्रतिभाशालीले मात्रै यसबाट राम्रो जीवनयापन गर्न सक्छन् । अधिकांश कलाकारहरूले आर्थिक सुरक्षा नपाउँदा अन्य पेशा वा जागिरमा निर्भर हुनुपर्ने, कलाको मूल्यांकन र अवसरको अभावले उनीहरूको संघर्ष झन् बढ्ने साथै हाम्रो समाजले कलाकारहरूको योगदानलाई अझ बढी सम्मान र मान्यता दिन आवश्यक रहेको ताकि उनीहरूले आत्मसम्मानका साथ आफ्नो कला पेशा बनाउन सकून् भन्दै कलाकारहरूको सिर्जनात्मकता बिना समाज अधूरो हुने बताउँछिन् कलाकार प्रतीक्षा ।

सिक्किम सरकारबाट कलाकारहरूलाई केही सहयोग र मान्यता दिइरहेको देखिन्छ, तर दीर्घकालीन योजना र आर्थिक समर्थन अझै आवश्यक रहेकाे बताउने प्रधान कलाकारहरू केवल मनोरञ्जनको माध्यम नभई संस्कृति, भाषा र पहिचानका संरक्षक रहेकाे र नेपालमा पनि यदि राज्यले कला, संस्कृति र सिर्जनशील क्षेत्रमा रोजगारी र अवसर सिर्जना गर्न सक्याे भने अन्तर्राष्ट्रिय स्तरमा सांस्कृतिक सम्पदा उजागर गर्न सकिने र कलाकारहरूको मूल्यांकन र संरक्षणले मात्र देशको सांस्कृतिक पहिचान दिगो हुने बिचार राख्छिन् प्रतिक्षा ।

कला र प्रतिभाको यात्राले आफूलाई आजको आत्मविश्वासी, दयालु र साहसी महिला बनाउने प्रतिक्षाले सन् २०२२ मा सिक्किम नेवा गुथीद्वारा आयोजना गरिएको ‘मिस नेवा सिक्किम’ प्रतियोगितामा भाग लिएर उपाधि जितेको अनुभव पाएको बताउँछिन् । त्यसपछि, मिस सिक्किम २०२३ को प्रदेशस्तरीय प्रतियोगितामा सहभागी भई ‘तीन विजेतामध्ये एक’ बन्न सफल भईन् । त्यसैगरी मिस नर्थ–ईस्ट २०२३ मा सिक्किम प्रतिनिधित्व गर्दै शीर्ष पाँचमा पुगीन् । त्यसपछि मिस नर्थ–ईस्ट इन्डिया सुपरमोडेल २०२४ मा पनि विजेतामध्ये एक बन्न सफल भईन् । प्रतिुक्षाले मिस Best Ramp walk २०२३ र मिस ट्यालेन्टेड २०२४ को उपविजेता बन्ने गौरव प्राप्त गरिन् । साथै, ‘Lotus Workshop’ र ‘Himalayan Fashion Week’ जस्ता प्रतिष्ठित कार्यक्रममा Ramp walk गरेर आफ्नो क्षमता प्रदर्शन गरिन् । यी सबै अनुभवहरूले उनलाई अनुशासित र नेतृत्व गुणले सम्पन्न बनायाे ।

हाल उनी नेपालभाषा र संस्कृति (नेवा भाषा र संस्कृति) मा स्नातकोत्तर तहको अध्ययन गरिरहेकी छिन् । सिक्किम सरकारको सहयोगमा सिक्किम नेवा गुथीमार्फत स्रोत व्यक्ति (resource person) का रूपमा काठमाडौँ पठाएकाे बताउने प्रतिक्षाआफ्नाे लक्ष्य भनेको आफ्नो मातृभाषा, संस्कृति, संगीत र परम्पराको गहिरो अध्ययन गरेर सिक्किम फर्किएपछि त्यहाँको नेवा समुदायबीच जागरण फैलाउने र हराउँदै गएको सांस्कृतिक पहिचानलाई पुनः जगेर्ना गर्ने रहेको बताउँछिन् । सिक्किमको नेवा समुदायको पहिचान पुनर्जीवनका लागि आफू गम्भीर रूपमा काम गर्ने प्रतिबद्धतासहित आएको बताउँछिन् । त्यसैगरी, पेजेन्ट क्षेत्रमार्फत पनि आफू निरन्तर अघि बढ्ने लक्ष्य राखेकी र भविष्यमा मिस इन्डिया वा मिस युनिभर्स इन्डिया जस्ता राष्ट्रिय तथा अन्तर्राष्ट्रिय मञ्चहरूमा सिक्किम र आफ्नो समुदायको प्रतिनिधित्व गर्न चाहन्छिन् । नेपालमा रहँदा उनले पाएको अपार माया, मार्गदर्शन र सहयोगप्रति अत्यन्तै आभारी रहेकी र यही समर्थनले आफ्नाे यात्रा अझ स्पष्ट, गहिरो र उद्देश्यपूर्ण बनेको बताउँछिन् ।

कुनै पनि क्षेत्रमा लाग्नुअघि स्पष्ट उद्देश्य र समाजमा सकारात्मक परिवर्तन ल्याउने सोच हुनु जरुरी रहेकाे, कला र संगीत केवल प्रतिभा देखाउने माध्यम होइन, समाजलाई सन्देश दिने शक्तिशाली माध्यम भएकोले नयाँ पुस्तालाई – “आफ्नो संस्कार र roots नबिर्सनुहोस्, निरन्तर मेहनत गर्दै आत्मविश्वासका साथ अघि बढ्नुहोस् । अवसर आफैं आउनेछ जब तपाईं इमानदारी पूर्वक आफ्नो लक्ष्य पछ्याउनु हुन्छ ।” भन्छिन् कलाकार प्रतीक्षा प्रधान ।