काठमाडौँ । पूर्व प्रधानमन्त्री डा. बाबुराम भट्टराईले राष्ट्रिय गौरवको बुढीगण्डकी जलाशययुक्त जलविद्युत आयोजनाको ‘हत्या’ भएको सामाजिक सञ्जालमार्फत टिप्पणी गरेका छन्।

उनले २०७४ जेठमा तत्कालीन प्रचण्ड सरकारले सुरु गरेको ‘घाँटी रेट्ने’ कामलाई ओली सरकारले २०८२।०८३ को बजेट वक्तव्य (बुँदा २२४) मार्फत ‘सार्वजनिक निजी साझेदारीमा निर्माण गरिनेछ’ भनेर पूरै ‘घाँटी छिनालेको’ आरोप लगाएका छन्।

भट्टराईले यसलाई देश र जनतामाथि अक्षम्य अपराध र धोका भन्दै यो सरासर बदनियतपूर्ण, जनविरोधी र राष्ट्रघाती निर्णयको घोर भर्त्सना र विरोध गरेका छन्।

देशको बहुआयामिक आर्थिक रूपान्तरणका लागि ‘गेमचेन्जर’ आयोजनाको रूपमा यसको प्रमुख परिकल्पनाकार र पहलकर्ताको नाताले उनले यस निर्णयको विरोध गरेका हुन्।

उनले भविष्यको उज्ज्वल सपनाका खातिर आफ्नो पुस्तौंदेखिको सम्पत्ति र थातथलो सहज हस्तान्तरण गरेर यो आयोजना कार्यान्वयनका लागि पूर्ण सहयोग गर्दै आएका गोरखा र धादिङका प्रभावित क्षेत्रका जनताप्रति पूर्ण सहानुभूति र ऐक्यबद्धता व्यक्त गरेका छन्।