रोशन ज्ञवाली
काठमाडौं । मदिरा व्यवसायी संघ कपिलवस्तुले नयाँ नेतृत्व पाएको छ । हिजो कपिलबस्तुको बुद्धभूमि २, गोरुसिंगेमा संघको आठौं साधारणसभा तथा पाँचौं अधिवेशनबाट अध्यक्ष पदमा कुलचन्द्र सिग्देल सर्वसम्मत निर्वाचित हुनु भएको छ ।

अधिवेशनले १६ सदस्यीय नयाँ कार्यसमिति चयन गरेको छ जसमा वरिष्ठ उपाध्यक्षमा गोविन्द प्रसाद पौडेल, प्रथम उपाध्यक्षमा रविन्द्र कुमार गुप्ता (कशौधन), द्वितीय उपाध्यक्षमा सुधिर कुमार गुप्ता र तृतीय उपाध्यक्षमा मधु सिग्देल रहनु भएको छ ।

यस्तै संघको महासचिवमा रामप्रसाद न्यौपाने, कोषाध्यक्षमा लोकेन्द्र पौडेल, सचिवमा खगेन्द्र पौडेल र सह कोषाध्यक्षमा बलराम घिमिरे अधिवेशनबाट सर्वसम्मत निर्वाचित हुनु भएको छ ।

यसैगरी समितिका सदस्यहरुमा बिनोद जयसवाल, कृष्ण प्रसाद गैरे, मनोज बञ्जाडे, ओम बहादुर थापा, विकास कुमार जयसवाल, जुना विष्ट र कृष्ण प्रसाद घिमिरे चयन भएको निर्वाचन मण्डलका संयोजक चुन्ना प्रसाद उपाध्यायले जानकारी दिनु भयो । अधिवेशनले ३ सदस्यीय लेखा समिति समेत गठन गरेको छ । जसको सदस्यहरुमा सुनिल श्रेष्ठ र टेकराज पौडेल सर्वसम्मत चयन भएका छन् ।

नव निर्वाचित अध्यक्ष सिग्देलले संघलाई चुस्त, दुरुस्त र पारदर्शी बनाउने विश्वास व्यक्त गर्नुका साथे उहाँले सबै मदिरा व्यवसायीहरुको हकहितका सवालमा संघले बुलन्द आवाज उठाउने उदघोष गर्नुभयो । अध्यक्षको पदभार ग्रहण गर्दै नवनिर्वाचित अध्यक्ष सिग्देलले करलाई मैत्रीपूर्ण बनाउन व्यवसायीलाई आग्रह गर्नुभयो ।

सबैभन्दा बढी राजश्व असुली हुने व्यवसाय नै मदिरा व्यवसाय भएकाले यसको नीति नियमबारे सबैले जानकारी राख्नुपर्नेमा उपस्थित वक्ताहरुको जोड रहेको थियो । उनीहरुले जिल्लाभरका सबै मदिरा व्यवसायी संगठित हुनुपर्नेमा जोड दिए । २०७२ सालमा गठन भएको कपिलवस्तु मदिरा संघमा जिल्लाका ७ दर्जन बढी मदिरा व्यवसायी आबद्ध छन् ।

स्मरणरहोस सिग्देल यस क्षेत्रमा विगत २० बर्षभन्दा बढी क्रियाशील रहँदै आउनु भएको छ ।