एलिशा ढुंगाना
‘यति सानै उमेरमा यति ठूलो नाम साथै मनग्गे दाम पनि’ सबैले उनलाई सोध्ने प्रश्न यही हो । उनी यो प्रश्नको जवाफ दिँदादिँदै एकातिर हैरानी बनेकी छिन् भने अर्कातिर आफूले गरेको सीपको कदर भएकोमा प्रशन्न छिन् । कामप्रतिको निरन्तर मेहनतले नै फेसिएल हाउसकी सञ्चालक सुष्मा महराले अहिले आफूलाई अन्तर्राष्ट्रिय जगतसम्म स्थापित गरिसकेकी छिन् । समयको व्यवस्थापनका साथै अन्य विषयमा पनि उनी सधैं साथीभाई र शुभेच्छुकहरुसँग कुराकानी गरिरहन्छिन् । मिजासिली स्वभावकी धनी ब्यूटिसियन सुष्मा महरालाई आजभोलि सबै व्यवस्थापन त्यति गाह्रो भएको छैन । उनी अभियानका क्रममा विभिन्न जिल्लामा पुगेर तालिम समेत दिँदै आएकी छिन् । उनले केही ठाउँमा शाखा पनि खोलेकी छिन् । फेसियल हाउस स्थापना भएको आज १५ वर्ष पुगेको छ ।

उहाँलाई शुरुमा भेट्दा मेरा मनमा पनि अनेक प्रश्न उत्पन्न भएका थिए । ती प्रश्नलाई उहाँले सजिलै जवाफ दिनुभयो । त्यसबाट म प्रभावित भएँ । काठमाडौँ मलको चौथो तलामा पुग्दा लिफ्टको ढोका खुल्नेबित्तिकै देब्रेपट्टी निलो र सेतो रंगले फेसियल हाउस लेखिएको पसल देखिन्छ । हो, त्यही पसलमा पुगेर मैले पनि उहाँसँग जीवन, संघर्ष र सफलताका बारेमा कुराकानी गरेकी थिएँ ।

हेर्दा सानी र फुच्ची देखिने सुष्मा महराको उज्यालो अनुहारले मैले एकैछिन अगाडिको काठमाडौँको धुवाँ, धुलो र ट्राफिक जाम बिर्सिएँ । मुस्कुराउँदै ग्राहकहरुसँग उहाँले गरेको कुराकानी साँच्चै लोभलाग्दो थियो । व्यस्त जीवनशैलीमा त्यहाँ पुग्ने जोकोहीलाई पनि उहाँको हसिलो मुहार र सेवाबाट सकारात्मक उर्जा मिल्ने अनुमान गर्न सकिन्छ ।

सौन्दर्यविद् िसुष्मासँगको कुराकानीमा धेरैपटक मेरा आँखा रसाएका छन् । तर उहाँले भने दुःखका कुरा, संघर्षका कुरा र विगतका कुरालाई सफलताका मिठा पलहरुसँग घुटुक्क पिउँदै हाँसेर कुराकानी गरिरहनु भयो । उहाँका आँखामा भने जतिसुकै पीडा भोगे पनि आँशु झरेनन् । आँसु खसाल्नु भनेको आफूलाई कमजोर बनाउनु हो भन्दै खुसी नै बाँडिरहनु भयो उहाँले । उहाँको सफलताको वर्णनमा म पनि उत्साहित भएँ र केही सिक्ने प्रयत्न गरेँ ।

२०५५ सालदेखि उहाँ सौन्दर्य क्षेत्रमा आबद्ध हुनुहुन्छ । महरालाई फेसियल हाउसको सञ्चालक भनेर चिनिँदा गर्वको महसुस हुन्छ । फेसियल हाउसको नामबाटै नेपालमा मात्रै होईन विश्वबजारमा पनि चिनिन पाउँ भन्ने आकांक्षा उहाँको पूरा हुँदै गएको छ । जन्मिनेवित्तिकै परिवारले दिएको नाम, त्यसपछि उमेरसँगै जोडिएका सम्बन्धपछिका नामभन्दा आफूले कर्म गरेर कर्मथलोबाट प्राप्त गरेको सफलताको नाम सबैभन्दा प्रिय हुने रहेछ भन्दै फेसियल हाउसकी सञ्चालक महरा अहिले प्रशन्न हुनुहुन्छ । उहाँले जीवनमा अझै पनि धेरै काम गर्न बाँकी रहेको र त्यो लक्ष्य पूरा गर्ने दाबी गर्दै आउनुभएको छ ।

फेसियल हाउसले उहाँको आर्थिक स्तर मात्रै होईन, ईज्जत, मान र प्रतिष्ठा पनि बढाइदिएको छ । उहाँले सुरु गर्दा फेसियल हाउसको यो यात्रा यति लामो र सानदार हुन्छ भन्ने सोच्नु भएको थिएन । एउटा सानो कोठाबाट सुरु गरेको पार्लर अहिले नेपालको नम्बरवान ब्राण्डेड ब्यूटिसलुनमा परिचित छ । १५ वर्षमा उहाँका ६ वटा ब्रान्च खुलिसकेका छन् । अब छिट्टै चितवन, विराटनगर र हेटौडामा पनि आउटलेट विस्तार गर्ने तयारी रहेको छ ।

आफ्नो कामसँग रमाउने सौन्दर्यविद् सुष्मा महराको सफलतामा उहाँको कामप्रतिको निरन्तर लगाव, इमान्दारिता, आँट र धैर्यताका साथै विश्वास पनि हो । उहाँ सकारात्मक सोच र कर्मले सबैको विश्वास जित्न सकिने बताउनुहुन्छ । उहाँका ग्राहकहरुले उहाँलाई गरेको विश्वासले उहाँलाई काम गर्न थप हौसला मिलेको छ । त्यसो त, उहाँले विगतमा विश्वासले अरुसँग सहकार्य गरेर काम गरको तितो अनुभव पनि सम्हाल्नु भएको छ । त्यसैले अहिले भने जेजस्तो भए पनि एक्लो प्रयासमा अघि बढ्नुभएको छ । अहिले उहाँलाई सहयोगी बनेर उहाँका श्रीमान कर्पोरेट विजनेश म्याग्जिन तथा कर्पोरेट खबर डटकमका अध्यक्ष उज्वलजंग शाहले साथ दिईरहनु भएको छ । श्रीमान र परिवारको साथ पाएर नै आफू सफल हुन सकेको महरा बताउनु हुन्छ ।

एकै ठाउँमा बसेर सबैलाई व्यवस्थापन गर्न सकिने टेक्नोलोजिमा उहाँको रुची रहेको छ । उहाँलाई नयाँ खोज र अनुसन्धान गर्न मन पर्छ । विभिन्न देशमा गएर सुष्माले ब्यूटिसियन तालिम पनि लिनु भएको छ । नयाँ नयाँ प्रविधि खोज्नु उहाँको विशेषता जस्तो नै बनिसकेको छ । सुष्मा आफ्ना ग्राहकहरुलाई पनि नयाँ प्रविधिको प्रयोग गरेर सेवा दिइरहनु भएको छ । टेक्नोलोजीमार्फत फेसियल हाउसको सेवालाई थप प्रभावकारी बनाउन उहाँले केही समय अगाडि ‘भेटायो एपसँग’ सम्झौता गर्नुभएको छ । ‘भेटायो एप’ एक अनलाईन प्लेटफर्म हो । जहाँ विभिन्न १२ वटा सेवाहरु उपलव्ध छन् । यसमा व्युटिसम्बन्धी सेवा पनि लिन सकिन्छ ।

विभिन्न उपलब्धि र चुनौतीका बाबजुद पनि नेपालको उत्कृष्ट व्युटिपार्लर बन्न सकेको फेसियल हाउसमा सामान्यदेखि उच्च घराना, चर्चित सेलिब्रेटी र विदेशीसम्मले सेवा लिने गरेका छन् । ग्राहकका कुरा ध्यान दिएर सुन्ने र उनीहरुलाई पर्याप्त समय दिएर सरसल्लाह र सुझाब दिने भएकाले फेसियल हाउसमा ग्राहकहरुको चाप बढ्दो छ । पारिवारिक वातावरणमा ग्राहकले सेवा लिन पाउँछन् । ग्राहकले आफ्नो रुची अनुसारको उपयुक्त श्रृंगार गर्न पाउँछन् । हरेक ग्राहकहरुलाई सुन्दर बनाईदिएर उनीहरुको मन खुशी पार्न माहिर हुनुहुन्छ महरा । उहाँको पार्लरमा महिला र पुरुष दुवैले सेवा लिन सक्छन् ।

जति ‘फेसियल हाउस जवान हुँदै गएको छ आफू पनि त्यति नै जवान भएको अनुभव हुन्छ महरालाई । उहाँ सधैं सकारात्मक सोच राख्ने व्यक्ति भएकाले सानातिना समस्यामा कहिल्यै र कोही पनि आत्तिन नहुने सुझाव दिनुहुन्छ । दुःखका साथ जीवन जिउँदा पनि उहाँलाई कहिल्यै पनि असहज लागेन । ‘सधैँ आफ्नो मनलाई जवान राख्नुपर्छ अनि मात्रै जिन्दगी जीउनुको मज्जा आउँछ’ उहाँ भन्नुहुन्छ ‘जीवन भनेको दुःख सुख हो जेजस्तो आउँछ गर्दै र पचाउँदै जानुपर्छ ।’ उनको विचार मलाई गज्जब लाग्यो ।

त्यसो त, सुन्दरतालाई ‘बाहिरी र भित्री’ दुई भागमा बाँडिन्छ । बाहिरी सुन्दरताको काम गर्ने सुष्माको भित्री सुन्दरता साँच्चै अतुलनीय छ । उहाँ सबैलाई समान ढंगले सम्मान गर्न मनपराउनु हुन्छ ।
दुई दशकअघि ब्युटी पार्लर खोलेर सौन्दर्य क्षेत्रमा पाइला अघि सारेकी सुष्मा महराको ‘फेसियल हाउस’ १५ औं वर्षमा प्रवेश गरेको छ । ‘फेसियल हाउस’ १५ औं बार्षिक उत्सव मनाउँदै गर्दा अझै पनि आम मानिसकोे विश्वास जित्दै लोकप्रिय बन्दै जानेमा सुष्मा महरा ढुक्क हुनुहुन्छ ।

बजारका ब्युटीपार्लरकोे प्रतिस्पर्धामा फेसियल हाउसबाट एकैपटकमा ५५ देखि ६० जना ग्राहकले सेवा लिन सक्नेछन् । यहाँबाट राष्ट्रिय अन्तर्राष्ट्रिय स्तरका ब्यूटिसम्बन्धी कोर्सहरु संचालन भईरहेका छन् । तालिमपछि उत्कृष्ट विद्यार्थीहरुका लागि रोजगारीको पनि सुविधा रहेको छ । जसले गर्दा नेपालको ‘नम्बर वान’ व्युटिसैलुनको अवार्ड पाइसकेको फेसियल हाउसले ग्राहक र विद्यार्थीको विश्वास जितिरहेको छ ।

सौन्दर्यविद् सुष्मा महराले भोलिका दिनमा पनि ग्राहक र शुभचिन्तकको विश्वास पाइरहने अपेक्षा गर्नुभएको छ ।