काठमाडौं । काठमाडौं क्षेत्र नं २ मा प्रतिनिधिसभा सदस्यका लागि ३० जना उम्मेदवार चुनावी मैदानमा छन् । त्यसमध्ये लौरो चुनाव चिन्ह लिएर मैदानमा ओर्लिएका उम्मेदवार हुन् कोषराज सुवेदी । संसदीय निर्वाचनमा पहिलोपटक होमिएका सुवेदीले विमा अभिकर्ता हुँदै डेपुटी सिइओसम्मको जिम्मेवारी सम्हालेका छन् ।
विमा अभिकर्ताका रुपमा प्रवेश गरेर डेपुटी सिइओसम्म पुग्ने उनी नेपालकै पहिलो व्यक्ति मानिन्छन् । वित्त क्षेत्रमा २० वर्षभन्दा बढी समय काम गरेका उनी युनियन लाइफको डेपुटी सिइओ थिए । सामान्य किसान परिवारमा जन्मिएका सुवेदी विमा तथा वित्त क्षेत्रमा आफूले हासिल गरेको ज्ञानका माध्यमबाट देशको मुहार परिवर्तन गर्ने उद्देश्यका साथ निर्वाचनमा होमिएको बताउँछन् । डिजिटल विमाको अवधारणा अन्तर्गत अघि बढेका सुवेदी नेपालको पहिलो इन्स्योरेन्स एग्रिगेटर कम्पनी मेरो विमा डटकमका संस्थापक समेत हुन् । सोचसँग समृद्धिको यात्रा आफ्नो मूल उद्देश्य रहेको उनको भनाई छ ।
चुनावी प्रचार प्रसारको फरक शैली छ उनको । लौरो टेकेर मतदाताका घरघरमा पुगेका सुवेदीको अहिले पाँचौ चरणको घरदैलो अभियान चलिरहेको छ । मंसिर ४ मा भोट हाल्न निर्वाचन केन्द्रमा आउन आग्रह गर्दै आफूले ६९ हजार मतदातालाई घरमै गएर निमन्त्रणा गरेको उनको भनाई छ ।
वैकल्पिक शक्तिका रुपमा लौरोको विकल्प नभएको भन्दै चोक चोकमा भइरहेका चिया गफबाट आफू उत्साहित भएको उनी बताउँछन् । गएको स्थानीय तहको निर्वाचनमा लौरो चिन्हलाई जनताले जुन प्रकारको माया गरेका थिए त्यस्तै प्रकारको माया पाउँनेमा उनी विश्वस्त देखिन्छन् ।

डिजिटल नेपालको वृहत्तर योजना आफूसँग रहेको बताउँदै उनी भ्रष्टाचार निवारण, शिक्षा, स्वास्थ्य र रोजगारीको ठोस योजना आफूसँग रहेको दाबी गर्छन् । काठमाडौं क्षेत्र नं २ बाट अत्याधिक मतका साथ विजयी हुने दावी गरेका सुवेदी जनताले कुरालाई भन्दा कामलाई विश्वास गर्ने बताउँछन् ।