खोटाङ । नेपाली कांग्रेस खोटाङले आगामी मंसिर ४ गते हुने निर्वाचनको लागि कांग्रेस नेता रोजन राईलाई संघ र प्रदेश दुवै तहको लागि नाम सिफारिस गरेको छ ।

जिल्लाबाट यसरी संघ र प्रदेश दुइवटै तहमा सिफरिस हुनेमा राई मात्र एक्लो नेता हुन् । खोटाङमा चर्चित नेताका रुपमा रहेका राई पार्टीको पटक पटक महाधिवेशन प्रतिनिधि भएका छन् भने नेपाल विद्यार्थी संघको केन्द्रीय सदस्य, केन्द्रीय कार्यसमितिको केन्द्रीय वि भाग सदस्य हुँदै काम गरेको अनुभव छ उनीसँग । विद्यार्थी आन्दोलन होस् वा लोकतान्त्रिक आन्दोलन, सधै अग्रपंक्तिमा र अग्रमोर्चामा लड्ने नेता हुन् उनी । पार्टी सभापति तथा प्रधानमन्त्री शेरवहादुर देउवाको नजिकका पात्रको रुपमा रहेका राइलाई सञ्चारमन्त्री ज्ञानेन्द्र बहादुर कार्की र गृहमन्त्री बालकृष्ण खाणको सहयोग रहने हुँदा संघ र प्रदेशमध्ये एउटामा टिकट हात पार्न सक्ने नेताहरुको बुझाई रहेको छ । राई पत्रकारितामा पनि स्थापित व्यक्तित्व हुन् । उनले नेविसंघकै पृष्ठभूमिबाट महामन्त्री बनेका विश्वप्रकाश शर्मा, गगन कुमार थापा सहमहामन्त्रीहरु किशोर सिंह राठोर र बद्री पाण्डेसँग पनि राम्रो सम्बन्ध राख्ने गरेकाले उनी उम्मेदवार हुने सम्भावना बढेको जनाइएको छ ।

अधिकांश समय गाउँघरमा गएर जनताको काममा सक्रिय भएर लागेका उनी अहिले मतदाताले नयाँ सोच र भावना बोकेका जनप्रतिनिधि रोजेकाले आफू त्यो विशेषता भएको बताउँछन् । स्थानीय तहको निर्वाचनमा पनि खोटाङमा कांग्रेसले बलियो उपस्थिति जनाएको छ । उनले अबका दिनमा एमालेले हिजोको कथा सुनाएर जनताको मत नपाउने पनि दाबी गरेका छन् । ‘एमाले त राष्ट्रिय र अन्तर्राष्ट्रिय रुपमा नै कमजोर भएको छ त्यसैले अब जनतालाई जति झुक्याए पनि एमालेले मत पाउन सक्दैन’ राइले भने ।

राइसँगै प्रतिनिधिसभाको उम्मेदवारको लागि सुवासकुमार पोखरेल, भुपेन्द्र राई, डा। राजकुमार राई, आरपी आचार्य, योगेन्द्र राई र सर्वद्धन राई सिफारिसमा परेका छन् । त्यसैगरी प्रदेश सभा सदस्यमा पनि समानुपातिकतर्फ रोजन राईको एक नम्वरमा नाम सिफारिस भएको छ । राइसँगै देबी राई, दुरेन्द्र राई, पेशलकुमार राई, डिल्ली कुमारी आचार्य, राजन राई र हिरा निरौला पनि आकांक्षी रहेका छन् ।