काठमाडौं । नेपाली कांग्रेसको १५ औं महाधिवेशन आजदेखि काठमाडौंमा हुँदैछ । गत पौषमा विशेष महाधिवेशनबाट आएको नयाँ नेतृत्वले महाधिवेशन गराउन लागेको हो । विशेष महाधिवेशनबाट सभापतिमा गगनकुमार थापा निर्विरोध चयन भएका थिए । पदाधिकारी र केन्द्रीय सदस्यको पनि निर्विरोध निर्वाचित भएका थिए ।

कांग्रेसको यो महाधिवेशनलाई विशेष चासोका साथ हेरिएको छ किनभनें पार्टीमा नयाँ नेतृत्व आएपछि सुरुदेखि नै बिबाद हुँदै आएको छ । तत्कालीन सभापति शेरबहादुर देउवाले नियमित महाधिवेशन गराउने चासो नदेखाएको आरोप लगाउँदै त्यतिबेलाका महामन्त्रीहरु गगनकुमार थापा र विश्वप्रकाश शर्माले अग्रसरता देखाएर विशेष महाधिवेशनको आयोजना गरेका थिए । विशेष महाधिवेशन सफल नभएको भए आफ्नो राजनीति संकटमा पुग्छ भनेर बुझेका थापालाई त्यो विशेष महाधिवेशन गर्न त्यति सजिलो पनि थिएन तर अन्तिममा सबैको सहयोग पाएपछि थापा सफल भए । तत्कालीन सभापति शेरबहादुर देउवा र उनका पक्षधरले यो नेतृत्वलाई मानेका छैनन् । उनीहरु आफूहरु नै आधिकारिक कांग्रेसको नेता भएको भन्दै आएका छन् । विशेष महाधिवेशनलगत्तै प्रतिनिधिसभाको निर्वाचन आएको थियो, यो निर्वाचनमा सभापति थापाले नै हस्ताक्षर गरेर टिकट बाँडेका थिए । थापालाई अबैधानिक मानेका भए पनि देउवा पक्षका केही नेताले थापासँग मागेर टिकट लगेका थिए । देउवा सभापति भएर निर्वाचनमा गएको भए त्योभन्दा बढी मत आउँथ्यो भनेर त्योपक्षले दाबी गर्दै आएको छ तर कांग्रेसको यो नेतृत्वले भनें कांग्रेस रुपान्तरित भएकाले यति मत आएको देउवा नै भएको भए त्यही पनि आउँदैनथ्यो भन्ने तर्क गरेका छन् ।

कांग्रेसको आधिकारिकताको विषय बिबादित भएको बेला अर्कोपक्षले सर्वोच्च अदालतमा पुनरावलोकनको लागि निवेदन दिएको छ । अझै पनि देउवापक्ष भनें आफूले नै आधिकारिकता पाउने दाबी गर्दै आएको छ । यो महाधिवेशनमा देशभरबाट धेरै युवाहरु प्रतिनिधि भएर छानिएका छन् । विभिन्न क्षेत्र र समूहलाई नेतृत्वमा आउने अवसर कांग्रेसले दिएकाले पनि यो महाधिवेशनलाई विशेष अर्थपूर्ण रुपमा हेरिएको छ । उता देउवापक्षले पनि असोज १५ गतेदेखि महाधिवेशन सुरु गरेको छ । उसले मंसिर २१ गतेदेखि केन्द्रीय महाधिवेशन गर्ने तयारी गरेको छ । देउवाले केही दिनदेखि निरन्तर सन्दशे प्रवाह गर्दै आएका छन् । उनले आजदेखि हुने महाधिवेशन अबैध भएकाले त्यसमा भाग नलिन सबैलाई अनुरोधसमेत गरेका थिए । देउवाले १४ औं महाधिवेशनबाट आफू सभापतिमा निर्वाचित भएकाले आफ्नै नेतृत्वमा महाधिवेशन गर्न पाउनुपर्ने माग पनि गरेका थिए ।