काठमाडौँ । चर्चित हास्य कलाकार शिवशंकर रिजाल ‘जोगिन्दर’को अभिनय रहेको म्युजिक भिडियो ‘बसौँ हजुर’ सार्वजनिक भएको छ । बसन्त थापा मगरको शब्द, संगीत र स्वरमा तयार पारिएको रोमान्टिक गीतको भिडियोमा जोगिन्दरलाई मोडल सेजल कँफियासँग रोमान्टिक अवतारमा प्रस्तुत गरिएको छ ।
हास्य भूमिकामा दर्शक रिझाउदै आएका जोगिन्दर र मोडल सेजलको केमेस्ट्री भिडियोमा सुहाउदो देखिएको छ । भिडियोमा लामो समयको विदेश वा बाहिरी बसाइबाट आफ्नो गाउँ फर्किँदाको खुसी, बाल्यकालका साथीभाइसँगको आत्मीय मिलन र आफ्नो प्रियसीसँगको सामीप्यतालाई मुख्य विषयवस्तु बनाइएको छ।
प्राकृतिक सौन्दर्यले भरिपूर्ण ग्रामीण परिवेश, हरियाली खेतबारी, नदी किनार र परम्परागत नेपाली गाउँघरका दृश्यहरूले भिडियोलाई थप आकर्षक र जीवन्त बनाएका छन् । रामेश्वर हुमागाईं र शौखिन तिमल्सिनाको छायांकन रहेको यस भिडियोलाई शौखिन तिमल्सिनाले नै सम्पादन गरेका हुन् ।
पछिल्लो समयका चर्चित र ब्यस्त निर्देशक समन अधिकारी निर्देशित भिडियो ‘रेस्क्यु क्रिएसन’ को ब्यानरमा निर्माण भएको हो । भिडियोले नेपाली गाउँघरको मौलिकता, प्रेम र पुरानो यादलाई ताजा गराउने प्रयास गरेको छ । हास्य विधाभन्दा फरक भूमिकामा प्रस्तुत भएका कलाकार जोगिन्दरको यो नयाँ शैलीलाई दर्शक तथा श्रोताले सकारात्मक रूपमा लिने अपेक्षा निर्माण पक्ष्को छ ।