काठमाडौं । सशस्त्र प्रहरी बल नेपालको १३ औँ महानिरीक्षकमा नारायणदत्त पौडेलको बढुवा भएको छ । सोमबार सिंहदरबारमा बसेको मन्त्रिपरिषद्को बैठकले एआईजी पौडेललाई महानिरीक्षकमा बढुवा गर्ने निर्णय गरेको हो ।

वर्तमान महानिरीक्षक राजु अर्याल यही वैशाख १८ गते अनिवार्य अवकाशमा जाने भएपछि सरकारले एआईजी पौडेललाई आइजीपी बनाउने निर्णय गरेको हो । तीन दशकभन्दा लामो सुरक्षा सेवाको अनुभव बोकेका सुरक्षा अधिकारीका रूपमा पौडेल परिचित छन् । नेपाल प्रहरीबाट करियर शुरू गरेका पौडेल २०५८ वैशाख ४ गते सशस्त्र प्रहरी बलमा स्थानान्तरण भएका थिए ।

स्नातकोत्तर तहसम्म अध्ययन गरेका पौडेलले नेपाल प्रहरीमा रहँदा रोल्पामा स्ट्राइकिङ टोली कमान्डरका रूपमा कार्य गर्दै चुनौतीपूर्ण सुरक्षा अवस्थामा प्रभावकारी नेतृत्व प्रदर्शन गरेका थिए । सुर्खेतको साविक जर्बुटा गाविस–५ मा जन्मिएका पौडेल संगठनमा सरल र मिजासिला मानिन्छन् ।