काठमाडौँ । नेकपा एमालेका नेता तथा पूर्वमन्त्री गोकुल बास्कोटाले पार्टीकै अर्का नेता शेरबहादुर तामाङमाथि गम्भीर आरोप लगाउँदै सार्वजनिक रुपमा कटाक्ष गरेका छन्।

सामाजिक सञ्जाल फेसबुकमार्फत बास्कोटाले तामाङलाई “चरम अवसरवादी पात्र” को संज्ञा दिँदै आफूमाथि भएको टिप्पणीको कडा शब्दमा प्रतिवाद गरेका हुन्। बास्कोटाले आफ्नो विचार राखेबापत तामाङले आफूमाथि सार्वजनिक रुपमा प्रहार गरेको गुनासो गर्दै यसलाई “कोदोवारी फाँडेसरह” व्यवहार गरिएको बताएका छन्।

आफूले राखेको मतका कारण तामाङ आक्रामक रुपमा प्रस्तुत भएको भन्दै बास्कोटाले यसले पार्टीभित्रको आन्तरिक कलहलाई सतहमा ल्याइदिएको बताएका छन् । आफ्नो स्टाटसमा बास्कोटाले तामाङको विगत कोट्याउँदै उनलाई व्यक्तिगत स्वार्थका लागि पार्टी र गुट फेरिरहने नेताको रुपमा चित्रण गरेका छन्।

तामाङले आफ्नो र आफ्नी श्रीमतीको पद प्राप्तिका लागि पटक पटक गुट बदल्ने गरेको र पार्टी फुटाउन समेत पछि नपर्ने गरेको बास्कोटाको आरोप छ। उनले वि.सं. २०३८ पछिको इतिहास हेर्न समेत चुनौती दिएका छन्।