काठमाडौं । भारतीय अधिकारीहरूले पाकिस्तानले भारत र भारतको कश्मीर क्षेत्रका सैनिक ठेगानाहरूमा मिसाइल र ड्रोन प्रहार गरेको बताएका छन् । तर पाकिस्तानले भने यसलाई अस्वीकार गर्दै भारतमाथि झुटो सूचना फैलाएको आरोप लगाएको सीएनएनले जनाएको छ ।

भारतको स्थानीय प्रहरी अधिकारीहरूका अनुसार पाकिस्तानको आक्रमणका कारण पञ्जाब, कश्मीर र राजस्थानका धेरै स्थानहरूमा ब्ल्याकआउट गरिएको छ । स्थानीय जनताहरूले डर र चिन्ता व्यक्त गरेका छन् ।

विस्फोट र ब्ल्याकआउट

भारतीय सेनाका प्रवक्ताले सीएनएनलाई बताएअनुसार भारत–नियन्त्रित कश्मीरको जम्मू सहरमा विस्फोट सुनिएको र त्यस क्षेत्रमा ब्ल्याकआउट गरिएको छ । पत्रकार र स्थानीय जनताहरूले सहरमा आतंक र तनावको अवस्था देखिएको बताएका छन् ।

पञ्जाबको पठानकोटमा पनि प्रहरीले विस्फोटको रिपोर्ट प्राप्त गरेको बताएको छ । अधिकारीहरूले दुवै स्थानमा हवाई सुरक्षा प्रणाली सक्रिय गरिएको बताएको समाचारमा जनाइएको छ ।

पाकिस्तानले सैनिक मारेको दाबी

पाकिस्तानको सूचना मन्त्रालयका अनुसार भारत–प्रशासित कश्मीरको वास्तविक सीमामा ४०–५० जना भारतीय सैनिक मारिएको दाबी गरेको छ । सीएनएनले यो दाबीको पुष्टि गर्न नसकेको र यसमा भारतीय रक्षा मन्त्रालयको प्रतिक्रिया मागेको छ ।

ड्रोन नष्ट गरेको दाबी

पाकिस्तानी सेनाका प्रवक्ता अहमद शरीफ चौधरीले २९ वटा भारतीय ड्रोनहरु नष्ट गरेको बताए । उनले ड्रोन हमलामा तीन जनाको मृत्यु र चारजना घाइते भएको पनि जनाए ।

पाकिस्तानमाथि भारतको आरोप

अमेरिकाका लागि भारतका राजदूत विनय क्वात्राले सीएनएनलाई भने, “गत बुधवार भारतले पाकिस्तानमा गरेको हमला अन्तिम द्वन्द्व मानेको र यसले तनाव अन्त्य गर्ने लक्ष्य राखेकोमा पाकिस्तानले तनाव बढाएको र भारतले आतंकवादी संरचनामा मात्र लक्षित गरेको छ ।”

कम्तीमा एक जेट नष्ट

अमेरिकी एक वरिष्ठ अधिकारी अनुसार भारतले पाकिस्तानी क्षेत्रमा गरेको हवाई हमलामा पाकिस्तानी सेनाले एक भारतीय जेट नष्ट गरेको छ ।
पाकिस्तानले फ्रान्स निर्मित तीनसहित पाँचवटा भारतीय युद्धक विमान नष्ट गरेको दाबी गरेको थियो । भारतले यसको प्रतिक्रिया दिएको छैन ।