काठमाडौ । नुवाकोट साहित्य प्रतिष्ठान नेपालसँगको समन्वयमा नेपाल प्रज्ञा प्रतिष्ठानले बागमती प्रदेश स्तरीय प्रज्ञा नारी काव्य सङगोष्ठी साहित्य समारोह नुवाकोट आदर्श बहुमुखी क्याम्पस बट्टार नुवाकोटमा यही बैशाख २० र २१ गते गर्ने भएको छ ।

नेपाल प्रज्ञा प्रतिष्ठानले देशको सातै प्रदेशमा विभिन्न साहित्यिक गोष्ठी र कार्यक्रमहरु गर्ने योजना अनुसार बागमती प्रदेश अन्तर्गत यसवर्षमा नुवाकोटमा आयोजना गरिएको हो । कार्यक्रममा बागमती प्रदेश नारी कविहरु विषयक कार्यपत्र प्रस्तुति तथा पुरक व्याख्या, काव्य सिर्जनामा नारी अन्तरक्रिया र बागमती प्रदेशका १३ जिल्लाका नारी कविहरुको कविता प्रस्तुति र वाचन विशेष रहने गरि कार्यक्रम तय भएको छ ।

देवीघाट ज्येष्ठ नागरिक संरक्षण तथा अध्ययन प्रतिष्ठान नुवाकोटको सहयोग पनि उक्त कार्यक्रममा रहेको कुरा नुवाकोट साहित्य प्रतिष्ठान नेपालका प्रवक्ता करण तामाङले बताएका छन् । सह आयोजकको रुपमा रहेको नुवाकोट साहित्य प्रतिष्ठान नेपालका साहित्यकारहरुको पनि सिर्जनाहरु प्रस्तुति रहने बताइएको छ । नुवाकोट आदर्श बहुमुखी क्याम्पसको हलमा २० गते कार्यक्रम विहान ११स्३० उद्घाटन हुने भनिएको छ । कार्यक्रम सकिएपछि नुवाकोटको ऐतिहासिक साँस्कृतिक पर्यटकीय क्षेत्रमा बागमती प्रदेशका १३ वटै जिल्लाका नारी कविहरु सहित प्रज्ञा प्रतिष्ठान समुहको साहित्यिक भ्रमण रहने कुरा प्रवक्ता करण तामाङले जानकारी दिएका छन् ।