काठमाडौं । प्रहरीको केन्द्रीय अनुसन्धान व्यूरो (सीआईबी)ले मेडिकल व्यवसायी दुर्गा प्रसाईंविरुद्ध साइबर क्राइमसहित तीन कसुरमा मुद्दा चलाउने तयारी गरको छ।

प्रसाईंविरुद्ध साइबर क्राइम, कागजात कीर्ते र मानहानीको कसुरमा अनुसन्धान गरिने र सोही बमोजिम मुद्दा चलाइने सीआईबीले तयारी गरेको हो।

प्रधानमन्त्री केपी शर्मा ओलीले कम्बोडियाको टेलिकममा ३२ अर्ब नेपाली रुपैयाँ लगानी गरेको दाबी गर्दै प्रसाईंले सोमबार एक भिडियो सार्वजनिक गरेका थिए। भिडियोमा प्रयोग गरिएको सामाग्री नक्कली रहेको दाबी गरिएको छ। प्रसाईंसँगै फेक भिडियो बनाउने अन्यलाई पनि कानुनी कारबाहीको दायरामा ल्याइने सीआईबीले बताएको छ।

सीआईबीको टोलीले प्रसाईंलाई मंगलबार उनकै निवास भक्तपुरबाट पक्राउ गरेको थियो। उनलाई आजै काठमाडौं जिल्ला अदालतमा म्याद थपका लागि पेस गरिने भएको छ।